Ikaupat nga miyembro sa pamilya ang gipatay

CEBU, Philippines — Ginang nga anak sa kanhi barangay kapitan sa lungsod sa Getafe, Bohol gipusil patay sulod sa lawak nga giabangan niini diha sa Barangay Suba Dakbayan sa Sugbo.

Giila ang biktima nga si Vicenta Abaño nga kasamtangan nagpuyo sa maong lugar.  Matud ni San Nicolas Police Station chief Police Major Kenneth Albotra nga sa initial nga imbestigasyon personal ang gitan-aw nila nga motibo sa pagpatay kang Abaño apan wala nila gisalikway ang lain pa usab nga motibo. Dugang pa ni Albotra nga makigalayon usab sila sa pamilya ni Abaño sa Bohol aron masayran kung aduna ba kini nakaaway.

Sa imbestigasyon sa kapolisan gituohan nilang gisundan si Abaño sa duha ka wala mailhing mamumuno diha sa iyang balay.

Ang mga silingan nakadungong nalang og duha ka buto ug ilang pagsusi sa balay ni Abaño nakitang naghigda ug wala nay kinabuhi  ang biktima. Nakaangkon siya og samad pinusilan sa liog ug tuong bukton.

Si Abaño maoy ikaupat sa pamilyang Abaño nga gipusil patay ning tuiga lang.

Una nga gipatay mao ang ilang amahan kanhi barangay kapitan sa Barangay Jagoliao lungsod sa Getafe nga si Alejandro Abaño.

Si Getafe Police Station chief Police Captain Benicer Tamboboy nagkanayon nga kalambigitan sa illegal nga drugas ang ilang gisubay nga motibo sa kamatayon sa barangay kapitan. Si Alejandro ug igsuon niini gipatay usab sulod sa ilang balay didto sa Jagoliao, Getafe niadtong Hunyo 28 ug niadtong Hulyo 19 ang manghod sab ni Vicenta iyang barangay ug gisunod ang igsuon niini

Ang ikatulo sa ilang banay nga gipatay mao ang manghud ni Vicenta nga si Ninolito Abaño nga gipusil sab sulod sa iyang auto shop sa Barangay Pahina San Nicolas sa Dakbayan sa Sugbo. Gitan-aw karon sa San Nicolas Police Station ang koneksyon sa maong upat ka pagpatay sa mga sakop sa pamilyang Abaño. – BANAT NEWS