Libreng gamit sa mga tinun-an sa siyudad

CEBU, Philippines — Aprobado na sa konseho sa Siyudad sa Sugbo ang ordinansa nga maghatag og libre nga gamit sa dili moninus 190,000 ka mga tinun-an sa publikong tunghaan sa elementarya sa siyudad.

Ang pagpirma ni Mayor Edgardo Labella sa ordinansa gitambungan nilang Bise Mayor Michael Rama ug mga konsehal niadtong Nobiyembre 26.

Ang ordinansa gipangamhanan ni Konsehal Raymond Garcia ug kabahin sa 2019 annual budget ang gahin nga P350 milyones alang sa mga gamit sa eskwelahan, uniporme ug sapatos.

Gawas niini may laing gahin nga P500 milyones alang sa programa sa edukasyon sa siyudad.

Matud ni Labella nga wala nay rason ang mga ginikanan nga dili ipadala ang ilang mga anak sa eskwelahan tungod kay ang mga gamit ihatag na sa siyudad. (Alicia Ivy L. Chua/GMR)

Septic tanks sa CPDRC habwaan

Sugdan na sa Cebu Provincial Detention and Rehabilitation Center ang paghabwa sa lima ka septic tank subay sa pagtuman sa environmental standards sa Department of Environment and Natural Resources.

Kini human nga ang Environmental Management Bureau niluwat og cease and desist order batok sa CPDRC tungod kay wala makatuman ang pasilidad sa wastewater standards.

Matud ni Reynaldo Valmoria, warden sa CPDRC, nga ang paglimpyo sa septic tanks himoon kini inigka gabii sanglit daghan ang angay nga ikonsiderar apil na ang truck ban.

Unang giplano sa CPDRC nga limpyohan ang septic tank niadtong Lunes sa gabii apan wala madayon.

“Wala madayon kay nanginahanglan man gud og request ba coming from CPDRC address to MCWD regarding sa ilang requirement... kinahanglan man gud og septic tank nga maoy mo-dislodge,” matud ni Valmoria.

Hinoon nangita sila og lain nga truck aron maoy mokarga sa hugaw gikan sa provincial jail.

Matud ni Valmoria nga adunay mga trucks nga mohakot sa mga hugaw gikan sa prisohan atol sa paglimpyo nga posibleng makahasol sa mga tawo kun adlaw himoon.

Si Valmoria nagkanayon nga ang dislodging usa ra kini sa dili mominus lima ka rekisitos nga gipangayo sa DENR-EMB aron nga makuha sa CPDRC ang environmental standards.

“Dili pa na siya (ang dislodgement), naa pa nay i-test pa unya treatment, pero mao gyud na ang primero ang amo, first and foremost ang pag-dislodge to make it dili mag-overflow,” matud ni Valmoria.

Ang CPDRC nakadawat sa CDO niadtong Nobiyembre 20 gikan sa EMB human usab sa sunod-sunod nga reklamo sukad pa kaniadto sa kabaho nga gikan sa maong prisohan. (/GMR)(BANATNEWS)