Cash incentives sa volunteers ihatag sa Disyembre

CEBU, Philippines —  Gilauman nga mahatag na sa Kapitolyo ang cash incentives sa mga volunteer sa barangay karong Disyembre.

Gikataho nga ang cash incentive sa mga volunteer giumentohan na kini.

Matud ni Gobernador Gwendolyn Garcia nga ang P3,000 nga cash incentive alang sa mga tanod direkta kining ihatag ngadto kanila sa unang semana sa bulan sa Disyembre niining tuiga.

Samtang ang P4,000 nga cash incentive sa mga barangay health workers, nutrition scholars, barangay animal health aide madawat ang ilang cash incentives ni atol sa general assembly nga ipahigayon diha sa Minglanilla Sports Complex sa Disyembre 18, 2019.

Ang maong cash incentives giumentohan na kini karon sa Kapitolyo gikan sa P1, 500 kaniadto sa mga tanod nahimo na nga P3,000 samtang sa mga BHWs ug ubang barangay volunteers gikan sa P2, 400 nahimo na kining P4mil.

Matud ni Garcia nga apil usab nga ihatag sa Kapitolyo ang BHWs kit ug bag-ong polo shirt.

Adunay ihatag usab nga kit alang sa mga tanod apan sunod pa kini nga tuig.

Si Garcia nagkanayon nga ang makadawat sa maong mga incentive kadto lang mga volunteer sa barangay nga nasulod sa guidelines nga gi-set sa hunta probinsiyal.

Kinahanglan lang nga naa sila sa opisyal nga listahan sa mga barangay volunteer.

“The tanod must have served the barangay for at least one year by 2018”, base sa guidelines. BDB (BANATNEWS)