CEBU, Philippines — Dunay gipatuman nga security measures ang kapolisan sa Dakbayan sa Lapu-Lapu subay sa kapistahan sa Mahal nga Birhen sa Regla.
Matud ni Lapu-Lapu City Police Office Director, Colonel Clarito Baja, nga gipatawag nila ang nagkadaiyang sektor sa siyudad sama sa security personnel sa mga malls, Muslim leaders, pump boat operators, habal-habal drivers ug uban pa aron makahatag og impormasyon sa kapolisan kun dunay mamatikdan nga katingad-an.
Gihimug-atan hinoon ni Baja nga sa kick-off gyud sa kapistahan duna na sila’y mga security personnel nga gipakatap aron mobantay sa mga nightly activities sama sa Hoopsdome ug simbahan alang sa nobena nga himoon.
Tinguha sa kapolisan nga wala’y mga deboto nga madisgraya ilabi na nga gilauman nila nga dili lang mga molupyo sa siyudad ang maghugop sa simbahan.
Hinoon wala’y na-monitor ang kapolisan nga dunay grupo o dayo nga maghimo og kasamok ug nanghinaut si Colonel nga magpadayon kini hangtud nga mahuman ang piyesta.
Gihimug-atan sab ni Baja nga gidili gyud ang pagdala og mahait nga hinagiban tungod kay ila gyud kining sakmiton.
Hangyo sab nila sa mga tawo nga mamista nga dili mag-display sa mga alahas ug dili magdala og dakung kantidad sa kwarta aron paglikay sa dili maayong panghitabo. GMR (BANATNEWS)