Sitio Pilapil, Barangay Casuntingan gipaubos na sa state of calamity

CEBU, Philippines — Ang konseho sa Barangay Casuntingan, Dakbayan sa Mandaue hingpit na nga nideklara og state of calamity sa Sitio Pilapil kagahapon sa buntag. Si Kapitan Oscar del Castillo nibutyag nga P800 mil nga gikan sa ilang calamity fund ang gamiton nila alang sa pagpanghatag og hinabang sa mga nabiktima sa sunog sa maong sitio.

Matud ni del Castillo nga ang P160 mil sa maong kwarta ipamalit nila kini og bugas ug tubig ug ang P640 mil ipamalit og housing materials.

Ang 97 ka homeowners ug 34 ka nangabang nga biktima sa sunog ang makadawat sa maong mga hinabang.

Ang mga nasunogan nagpabilin karon diha sa gym sa lugar samtang ang uban anaa sa lugar nga nasunogan. Giklaro ni del Castillo nga ang tanang pamilya nga apektado sa sunog makadawat og hinabang apan labaw ang madawat sa mga tag-iya sa balay kompara sa nangabang lang.

Dugang ni del Castillo nga padayon silang nanawagan og ayuda alang sa mga biktima sa sunog  diin nagkinahanglan kini og mga banig ug foam nga kahigdaan. (Rowena D. Capistrano/BDB)

Ilegal nga operasyon sa swertres gi-monitor

Hingusgan sa Criminal Investigation and Detection Group (CIDG)-7 ang operasyon sa illegal number games o swertres tungod kay giingong adunay pipila dinhi sa Sugbo nga anha himuon sulod sa peryahan ang maong sugal.

Kini ang gibutyag sa deputy chief director sa CIDG-7 Police Major Roland Allan Tolosa.

Matud ni Tolosa nga nisiaw pagbalik ang ilegal nga swertres dinhi sa Sugbo. Gibutyag ni Tolosa nga adunay report nga nadawat ang CIDG-7 gikan sa Camp Crame kabahin sa giingong ilegal nga operasyon sa nahisgutang sugal o walay pagtugot sa Philippine Charity Sweepstakes Office (PCSO).

Si Tolosa nagkanayon nga higpitan nila ang pag-monitor sa maong ilegal nga sugal diha sa nagkalain-laing dapit sa rehiyon-7.

Niadtong Huwebes, atol sa gipahigayong operasyon sa CIDG-7 diha sa nagkalainlaing lugar sa Sugbo walo ka tawo nga giingong nalambigit sa nahisgutang ilegal nga sugal ang nasikop.

Ang mga nasikop mao sila si Jasper Toñacao, 19-anyos taga Barangay Budlaan; Rosalie Lamban,38-anyos, taga Purok 1 Barangay  Talamban; Carmela Tapic, 19, taga Barangay Budlaan;  Marilou Taborada 30, taga Barangay Guadalupe; Eljun Fuentes, taga Barangay Hipodromo; Sheila Mae Bacurnay; Radel Mae Bordario pulos taga Dakbayan sa Sugbo ug Gilbert Cañete, taga Calape, Probinsiya sa Bohol.

Si Tolosa niawhag sa publiko nga anha mopatad og swertres sa mga PCSCO authorize nga mga Small Town Lottery. (/BDB)(BANATNEWS)