CEBU, Philippines — Manghatag ang kagamhanan sa Dakbayan sa Sugbo og tag P5 milyones sa tanang 80 ka barangay alang sa ilang pagpamalit og garbage trucks ug uban pang mga sakyanan nga magamit sa adlaw-adlaw nga operasyon.
Si City Legal Officer Rey Gealon nagkanayon nga gitahasan siya sa pagpadali sa pagpagawas sa maong pundo.
Kaniadtong Agosto gipahibawo ni Mayor Edgardo Labella nga ang tanang 80 ka barangay sa siyudad, kaalyado o dili sa politika, ang makadawat og P5 milyones.
Ang siyudad nigahin og P400 milyones alang sa pinansyal nga tabang sa mga barangay.
Si Labella niingon nga iyang gikonsiderar ang paghatag og dugang P5 milyones sa mga barangay sa sunod tuig basta ang mga barangay makatabang sa siyudad sa paglimpyo sa mga agianan sa tubig, pagkolekta sa basura, ug uban pa. (/GMR)(BANATNEWS)