Force multipliers nakatabang sa kahapsay ug kalinaw
CEBU, Philippines — Gihulagway sa kapolisan sa Dakbayan sa Mandaue nga malinawon ug hapsay ang mga sementeryo sa siyudad sa pagsaulog sa kalag-kalag ug adlaw sa mga Santos karong tuiga.
Giingong higpit ang seguridad nga giimplementar sa kapolisan diin adunay gipakatap nga mga enforcer nga momando sa trapiko ug mga tanod nga motabang usab sa pagbantay. Ang St. Joseph Parish Roman Catholic Cemetery nga nahimutang sa Barangay Guizo sa Dakbayan sa Mandaue maoy usa sa mga sementeryo nga gibisita sa liboan ka tawo sukad sa Nobiyembre 1 hangtud na sa hapon sa Nobiyembre 2.
Si Police Corporal Danny Camero sa Mandaue City Police Office (MCPO) nagkanayon nga labi pa gyud nga nagkadaghan ang mga tawo nga nibisita sa mga lubong hangtud na nianang hapon.
Apan bisan nga nagdasok ang mga tawo nga mosulod ug gawas sa nahisgutang sementeryo wala sila makasugat og mga problema tungod kay ang mga tawo nituman man usab sa gihimo nilang mga pamaagi sa ilang pagbantay sa paghatag sa ilang kasiguroan.
Sa ikaduhang adlaw sa ilang pagbantay wala na sila makamatikod og mga tawo nga nakahimo og kalapasan sa mga lagda nga ilang gipatuman nga naglakip sa gidili ang pagdala og hinagiban, ilimnong makahubog o mga paraphernalia sa pagsugal sama sa mga baraha.
Niadtong adlaw’ng Biyernes adunay mga nisulod nga nagdala og kutsilyo nga ilang gimiton sa pagpanglimpiyo, martilyo ug pala apan gipugngan kini sa mga polis sanglit higpit man nga gidili ang pagdala niini.
Matud ni Comero nga 20 ka polis sa Presinto 1 sa MCPO ang nagbantay sa Roman Cemetery ug lain usab nga mga polis ang gibutang sa mga pribado sementeryo
Si Police Lieutenant Lino Baylosis sa MCPO nagkanayon nga dako kaayo og gikatampo sa pagpatuman sa kahapsay ug kalinaw ang 200 ka force multipliers nga gilangkuban sa mga sakop sa Barangay Public Safety Officers (BPSOs) ug mga pundok nga mahigugmaon sa kahapsay ug kalinaw. (BDB)(BANATNEWS)
- Latest
