P2 milyones shabu nasakmit

CEBU, Philippines — Gibanabanang P2 milyones nga balor sa drugas ang nasakmit sa mga tinugyanan sa City Intelligence Branch sa Cebu City Police Office sa may Unit 3 Carbon Public Market, Barangay Ermita ning Dakbayan sa Sugbo Biyernes sa buntag.

Ang nasikop naila nga si Jeramil Macabali, alyas Jeramil, 19, nga giingong Regional High Value Target. Nangulo sa maong operation mao si Police Major Randy Caballes, hepe sa CIB uban sa pakig-alayon sa PDEA7.

Nasakmit gikan sa dinakpan ang mga pinutos s ginadili nga drugas nga motimbang og P175 gramos nga mobalor ug 1,199,000.00 base sa Dangerous Drug Board Value, sudlanan sa drugas ug buy bust money.

Samtang kapin sa tunga sa milyon ka pesos nga balor sa drugas ang nasakmit sa buybust operation nga gihimo sa kapolisan sa Labangon Police Station kagahapon diha sa Sitio Mahayahay 1, Brgy. Calamba.

Nasikop ang duha sila si Liemar Andrino Monreal, 25, habal-habal driver, nga maoy target sa operation samtang ang kauban niini mao si Roy Virador Vergara ,49, residente sa maong dapit.

Matud pa ni Police Captain Jonathan Dela Cerna OIC sa Labangon Police Station duha ka semana nilang gimonitor ang duha.

Gipalitan ang duha og P10 mil nga shabu  ug dihang nahuman ang transaksyon gidakop dayon sila. Nakuha sa mga dinakpan ang 15 ka medium nga pakiti nga motimbang og 75 gramos sa gituohang shabu nga mo balor kini og 510,000 pesos lakip sa nabawi sa operatiba ang buybust money nga 10,000 budol money. Ang duha pulos high value target sa siyudad ug apil sa city level drug watch list.

Samtang sa Dakbayan sa Lapu-Lapu, upat  ka mga gidudahang parok ang  nadakpan managlahing buy bust  operation nga gihimo sa mga sakop sa City  Drug  Enforcement  Unit  (CDEU) ug nasakmit ang 25  ka paketeng shabu.

Ang mga nangadakpan mao sila si Ian Jason  Benaro  Diaz, 30, Joeve Nazareth Badayos,  18, Rogelio  Sepe  Baclohan  Jr.,  36, Pedro Ompad  Rentillosa,  50, nga usa ka security  guard.

Samtang sa Dakbayan sa Talisay, usa ka engineer ug uyab niini ang gidakop sa kapolisan human gireklamo sa mga silingan apan nadiskubrehan hinuon nga duna kini ginadiling drugas ug drug paraphernalia diha sa usa ka subdivision sa Barangay Mohon niadtong miaging gabii. Ang  gidakop mao sila si Brandon Arbon, 43, ug si Emily Marilao, 24.

Si Police Captain Mikhail Mallorca, deputy chief sa Talisay City Police Station nagkanayon nga naalarma si Arbon human gireklamo sa pagpangulata sa usa ka Grab drayber uban sa iyang mga amigo. Apan pag-abot nila sa maong lugar ilang nakita ang mga drug paraphernalia nga naa sa lamesa sa ilang pinuy-anan hinungdan sa iyang pagkasikop.

Nakuha gikan kanila ang duha ka gagmay nga pakete sa shabu; usa ka aluminum tin foil; usa ka improvised tooter; upat ka linikit nga tissue ug usa ka disposable lighter.

Apan si Arbon mihimakak nga sa ila   nakuha ang mga ebidensya. Ug iyang giklaro nga maong dunay mga tag sa presyo ang ilang mga gamit sa sud sa balay tungod kay mobalhinay na sila ug dili tungod kay para sa illegal nga drugas ang halin niini.

Nahibaw-an sa mga otoridad nga gikan si Arbon sa laing nasud nga nagtrabaho apan sa dihang naa na kini sa Pilipinas naghimo og iyang construction firm. Ang tanang mga dinakpan pasakaan og kasong paglapas sa Republic 9165. (IBM)(BANATNEWS)