CEBU, Philippines — Nagplano si Gob. Gwendolyn Garcia nga butangan og permanente nga ticketing booth ang Cebu South Bus Terminal. Si Garcia nibisita sa CSBT kagahapon sa buntag diin iyang gisusi ang sitwasyon sa mga pasahero ilabi na ang pagpatuman niya sa “No Ticket, No Entry” policy.
“We would wish to put up permanent area sa mo-issue og tickets para makaderetso ra didto ang atong pasahero, kani makeshift pa man ni. And second we are looking at acquiring x-ray machine for cargo,” matud ni Garcia.
Pipila sa mga pasahero ang nireklamo tungod kay nakalitan sa bag-ong sistema nga gipatuman ug wala nahibalo asa padulong samtang ang uban gihasolan sa sistema.
Sa sulod anaa ang mga personnel sa CSBT ug ingon man ang trabahante sa bus aron pagtawg ug paggiya sa mga pasahero asa molinya ug mosunod.
Matud ni Garcia nga ang pagpatuman sa bag-ong sistema usa ka pamaagi sa pagseguro sa seguridad sa mga pasahero nga mobiyahe.
“Assured sila nga walay kalit nga panguot diri or bira sa ilang bagahe, so this is what we need to offer kay kining Cebu South Bus Terminal is for our passengers, first and foremost, all others secondary na na,” matud ni Garcia.
“This is balance against the safety and security of the terminal of our passengers, moagi lang gyud og discomfort kay sa ato ni ron, kung ablihan na nato tanan, hasta kamo wala na moy kabarugan diri kay uban nga dili pasahero moari diri sulod,” dugang sa gobernador.
Ang regional director sa LTFRB-7 nga si Eduardo Montealto Jr. niuyon sa sistema diin matud niya nga mohaum kini sa public utility vehicles modernization program diin mahimo na usab nga online ang pag-book sa pagsakay sa mga bus sa tuig 2020. (GMR)(BANATNEWS)