Tourist bus mo-back up
CEBU, Philippines — Dili mominus sa 22 ka bus gikan sa duha ka tourist bus company ang nisaad nga mo-deploy og mga sakyanan nga motabang og hakot sa mga pasahero sa Cebu South Bus Terminal alang sa kalag-kalag.
Si Gob. Gwendolyn Garcia ang nihangyo sa SMB ug Silver Line nga mopabiyahe sa ilang mga tourist buses kung magnihit ang mga bus sa terminal.
Kini atol sa tigum nga gipatawag ni Garcia sa taga Land Transportation Office, Land Transportation Franchising and Regulatory Board ug mga bus companies.
Wala motugot si Garcia nga mohuwam ang Kapitolyo og mga bus gikan sa kalungsuran tungod kay gamiton usab kini sa mga lungsod atol sa kalag-kalag.
Samtang dunay nakauyon ug may wala kasabot sa sistema nga gipatuman sa CSBT nga “No Ticket, No Entry” policy.
Si Provincial Treasurer, Atty. Roy Salubre, nipasabot nga gikonsiderar nila ang safety diin ang makasulod sa terminal kadto lang gyud ang mga pasahero.
“Makita nato nga murag we are still adjusting hopefully within few minutes from now ma-adjust nato basta ang importante ma-sanitize nato ang mosulod nga mga tawo”, matud ni Salubre.
Gipahinumduman sab ni Cebu City Vice Mayor Michael Rama ang mga Sugbuanon nga magpabiling magmabinantayon atol sa kalag-kalag.
Matud niya nga sa dili pa moadto sa mga sementeryo kinahanglan nga sirado ang balay ug patyon ang kuryente aron malikayan ang kawat ug sunog.
Sa laing bahin gipahugtan sab ang seguridad sa Mactan-Cebu International Airport pinaagi sa gidugang nga K9 roving patrol.
Dunay gibutang mga help desk nga dali nga maduol sa mga pasahero kung dunay mga kakulian. (GMR)(BANATNEWS)
- Latest
