Di magpataka palit og tiket
CEBU, Philippines – Subay sa nagsingabot nga kalag-kalag, giawhag sa Cebu Port Authority ang mga biyahedor nga dili magpataka og palit og tiket sa barko.
Matud ni Port Police Senior Supt. Glenn Sarador nga dili mopalit og mga tiket nga dili sa mga ticketing office aron malikayan ang mga overpricing.
Sumala pa ni Sarador nga adunay mga higayon nga nakasakop sila og mga namaligya og overpriced ticket diin ilang napahamtangan usab og silot.
Nakigtagbo sila uban sa nagkadaiyang ahensya ug ship owners nga mangita gyud og valid ID sa mga pasahero aron malikayang ang ticket scalping.
Gitug-an ni Sarador nga ipakatap nila ang mobantay sa mga pantalan human nakaisa na sila sa full alert status sugod pa sa nilabay nga semana hangtud sa Nobiyembre 8 lakip usab ang pagbutang og mga CCTV camera.
Si Sarador nitug-an nga nakaplastar na usab ang ilang mga X-ray machines nga mosusi sa mga bagahe sa mga pasahero hinungdan nga iyang giawhag ang mga biyahedor nga mas maayo duha ka oras sa dili pa ang biyahe niini anaa na sila sa pantalan.
Awhag ni Sarador sa mga badlongon sa katilingban nga dili nalang sila magbinuang tungod kay dili usab sila magduha-duha sa pagpaslak kanila sa Waterfront Police Station ug Mabolo Police Station.
Hugot usab nila nga gibantayan nga walay mga kontrabando nga makasulod ug makagawas sa Sugbo. Samtang gimando ni Gobernador Gwendolyn Garcia sa tagdumala sa Cebu South Bus Terminal nga dili magpasulod og mga tawo nga dili pasahero.
Matud sa gobernador nga duha ka semana na ang iyang mando apan wala kini napatuman.
“So that the bus liners should have the ticketing prior to the entrance into the passenger waiting area,” matud ni Garcia.
Matud sa gobernador nga ang terminal alang lang kini sa mga pasahero nga mopauli sa ilang tagsa-tagsa ka lungsod ug dakbayan gawas sa mga driver ug conductor ug tenants lakip na personnel sa CSBT ang anaa sa sulod.
Sumala sa gobernador nga usa sab kini ka paagi aron maseguro ang seguridad sa terminal ug malikayan ang bisan unsa nga insidente dala sa grabeng kadaghan sa mga tawo nga mosulod ug gawas.
Si Garcia mohimo og inspeksyon sa CSBT sa Oktubre 31 sa buntag. (GMR)(BANAT NEWS)
- Latest
