8 ka truck nga basura nahabwa

CEBU, Philippines —  Nahabwa ang mga basura gikan  sa mga kanal  sa nagkadaiyang kabarangayan sa Dakbayan  sa Lapu-Lapu  atol sa gipasiugdahang clean up drive  sa mga kawani sa mga pribadong buhatan, kagamhanan sa siyudad ug  grupo sa mga rider sa siyudad.

Ang14  ka establisamento nga nahimutang  sa Mactan Export  Processing Zone (MEPZ)  ang  nakighiusa   sa kagamhanan  sa maong dakbayan nga gipangulohan ni Mayor  Junard  Ahong  Chan sa pagpanglimpiyo  sa mga kanal.

Atol sa maong pagpanglimpiyo kasagaran sa mga nakuha sa grupo mga plastik nga basura nga napasok  sa ilawom sa kanal nga maoy nakaingon sa pagkabara sa pagdagayday  sa tubig nga moresulta sa pagbaha sa panahon nga kusog ang pagbunok  sa ulan.

Nikabat sa walo ka garbage truck ang gidaghanon sa nahabwa nga mga basura  gikan diha sa mga kanal ug kabaybayonan sa siyudad.

Ang mga basura nga nakuha gilangkuban kini sa mga plastic  bag, basiyo sa mineral  water ug ang pipila usab niini diha nila makuha  sa uban nga mga dapit  sa Dakbayan sa Mandaue.

Si  Mayor  Chan nipadayag sa iyang pagpasalamat sa mga tagdumala sa mga pribadong kompaniya ug grupo sa mga rider ug nanghinaot kini nga magpadayon ang ilang gipakitang susporta  sa kagamhanan ubos sa iyang administrasyon. BDB (BANATNEWS)