CEBU, Philippines — Gusto nga paabangan sa Probinsiya sa Sugbo ang duha ka pasilidad nga nahimutang sa Lungsod sa Tuburan ug sa Dakbayan sa Naga.
Matud ni Gobernador Gwendolyn Garcia nga nakighinabi siya sa taga Technical Education and Skills Development Authority aron maoy modumala sa maong mga training centers.
Apan matud sa gobernador nga nibalibad ang TESDA sanglit unom na ka pasilidad ang gidumala niini.
Hinoon nisaad ang maong ahensya nga morekomendar kini ngadto sa Kapitolyo og private training provider alang sa cooking, dress making, emergency medical service, carpentry ug uban pang skills training.
Matud ni Garcia nga nigasto na ang Kapitolyo og P32 milyones sa niaging administrasyon sa pagtukod sa maong mga pasilidad ug wala na siyay plano nga dugangan pa kini.
Apil usab nga ipagamit sa Kapitolyo ang mga building sa Cebu Provincial Women and Children Development Center (CPWCDC) sa Sudlon, Lahug, Dakbayan sa Sugbo alang sa gusto mopahigayon og seminar o training.
Plano usab sa Kapitolyo nga ihunong na ang pagpadagan sa My Home Center, usa ka pasilidad alang sa mga children in conflict with the law (CICL) sa Tayud, Consolacion.
Ang maong pasilidad gipanag-iya sa JPIC apan gihatag sa Kapitolyo aron maoy momintinar sa operation niini.
“So we will be writing JPIC, our position that the Province will no longer be operating this. So that there will be grounds to transfer the donation to the DSWD,” matud ni Garcia kinsa nidugang nga ang DSWD na maoy mopadayon og operate sa My Home Center. (/GMR)(BANATNEWS)