Motor batok motor, usa patay
CEBU, Philippines — Usa ang patay ug duha angol sa disgrasya sa National Highway sa Barangay Naalad, Dakbayan sa Naga niadtong Biyernes sa gabii.
Ang nakalas mao si Glen Gera, taga Toledo City nga nagmaneho sa iyang Suzuki Smash nga motorsiklo.
Samtang ang naangol mao sila si Warren Rosales, taga Barangay Mainit, nga nagmaneho sa nakabanggang motor ug ang iyang pasahero nga si Raymond Labriaga, 32, taga Sibonga.
Matud pa ni Police Staff Sergeant Nikki Carlo Plarisan, Desk Officer sa Naga Police Station, nagbiyahe gikan sa managlahing direksyon ang duha ka motor.Si Gera gikan sa Toledo padulong sa Naga, samtang sila Rosales gikan sa Naga padulong sa Toledo.
Sumala pang Plarisan, ni-overtake si Gera sa gisundan niini hinungdan nga nagsungag sila sa gimaneho ni Rosales sa pikas nga lane.
Tungod sa kakusog sa impact nangalagpot ang mga sakay sa duha ka motor.Gidala silang tanan sa tambalanan, apan si Gera, gideklarar nga dead on arrival, samtang ang duha nga sila Rosales ug Labriaga ang gidalas a Vicente Sotto Memorial Medical Center. (/IBM)(BANATNEWS)
- Latest
