CEBU, Philippines — Nikabat ngadto sa 420 ka indibidwal ang apektado sa nahitabong sunog niadtong Sabado sa kadlawon diha sa Barangay Sambag 1, Dakbayan sa Sugbo.
Si Sambag 1 Barangay Captain Aileen Guardo nibutyag nga base sa ilang listahan alas 6:00 sa gabii niadtong Dominggo nikabat sa 26 ka panimalay, 135 ka pamilya ug 420 ka indibidwal ang apektado sa maong sa sunog.
Diha sa silong sa barangay hall adunay gibutang nga booth aron anha itunol ang mga hinabang nga mo abot alang sa mga nasunogan.
Ang barangay nanghatag na usab og mga sinina, pagkaon nga dili daling madaot ug tubig sa mga biktima sa sunog.
Gipahibawo usab ni Guardo nga nagdeklarar na sila og state of calamity aron makahatag og ginagmay nga financial assistance sa mga nasunogan.
“Actually ang city of course naa gyud na sila’y financial assistance nga ihatag kay mas dako-dako man na sila og pundo kaysa barangay and of course naa sad guro na sila’y ipanghatag nga bugas or construction material, as of now wala pa ko’y update og unsay ilang mahatag pero sure gyud naa na sila’y mahatag nga financial assistance”, matud ni Guardo.
Matud ni Guardo nga sa pagkakaron ang mga nasunogan naa nila gipahimutang sa evacuation center nila nga mao ang barangay gym diha sa Sitio Tangkungan.
Ug ang mga nasunogan makabalik ra usab og tukod sa ilang panimalay tungod kay ang luna gipanag-iya man sa mga nasunogan. Dugang ni Guardo nga sila sa barangay nagplano nga mag-fund raising aron makahatag og financial assistance sa dalagita nga nakalas sa sunog. (BANAT NEWS)