Kadato sa Sugbo wa natagamtami sa katawhan

CEBU, Philippines — Giisip ni Gob. Gwendolyn Garcia nga hagit alang sa iyang administrasyon ang pag-ila sa Lalawigan sa Sugbo nga labing dato nga probinsiya sa tibuok nasud base sa Annual Financial Report sa Commission on Audit.

Matud ni Garcia nga walay pulos ang pagkadato kung wala natagamtami sa mga Sugboanon ang batakang serbisyo.

“These assets must be translated to service for the people. Unsa may gamit kung moingon ta nga dato kaayo ta pero pwerteng gubaa ang atong mga dalan, maglisud ang mga tawo, kada adlaw nag-antus moagi sa libaong. Walay tubig nga moabot sa ilang mga balay,” matud ni Garcia.

Ang Probinsiya sa Sugbo adunay P35.6 bilyones nga total assets.  Matud sa gobernador nga angay pasalamatan ang kadako sa napundo nga assets sa probinsiya sila si kanhi gobernador Rene Espina ug ang iyang amahan nga kaniadto usa pa ka practicing lawyer kinsa nipasaka og kaso aron mabawi ang 380 ka ektarya nga luna sa probinsiya.

Ang maong luna gidonar kaniadto ni kanhi bise gobernador Prescillano Almendras sa Dakbayan sa Sugbo.  Matud ni Garcia nga kung wala nabawi ang maong mga luna, hayan ang Probinsiya sa Sugbo unta ang usa sa labing pobre nga lalawigan sa Pilipinas. (/GMR)(BANATNEWS)