Fluvial sa Talisay malampuson
CEBU, Philippines — Mokabat sa 50 ka sakayan sa pandagat ang niapil sa gipahiagyon nga fluvial procession sa Dakbayan sa Talisay kagahapon sa buntag.
Kini subay sa nagsingabot nga kapistahan ni Santa Teresa de Avila karon ugmang adlawa.
Usa ka misa ang gipahigayon sa Barangay Laray sa wala pa gisakay ang imahen sa Santa Teresa ug Mahal nga Birhen sa sakayan pandagat nga gidayan-dayanan og mga banderitas sa may Talisay City Fish Port.
Sakay sa maong sakayan nga gisakyan ni Santa Teresa De Avila ug Mahal nga Birhen mao ang team moderator sa Archdiocesan Shrine of Santa Teresa De Avila nga si Fr. Miguelito “Pads Do” Sarmago ug uban pa.
Ang fluvial gisugdan sa Talisay Fish Port lagbas sa Poblacion padulong sa Barangay Pooc balik sa Larawan Beach sa Poblacion diin didto ginaug ang mga imahen dayon giinsinsohan una giprosesyon.
Bagang duot sa katawhan ang nag-atang sa fluvial procession samtang nagkalingaw sila sa pagpangaligo sa dagat.
Matud ni Sarmago nga nanghinaut siya sa mga dumudoong sa kapistahan ni Santa Teresa de Avila karon tuiga nga mag-ampo alang sa kalinaw ilabi na alang sa kabatan-onan nga mahimo silang instrumento sa pagpalambo dili lang sa siyudad apan apil na sa kinabuhing espirituhanon subay sa panag-ingnan ni Santa Teresa.
Malipayon ang mga Talisaynon nga niwara-niwara ug niitsa og mga buwak atol sa pag-agi sa patrona sa dakbayan. (/GMR)(BANATNEWS)
- Latest
