Budget sa CPDRC gipaubsan
CEBU, Philippines – Moabot nalang sa P73 milyones ang gisugyot nga pundo sa Cebu Provincial Detention and Rehabilitation Center (CPDRC) alang sunod tuig itandi sa P130 milyones karong tuiga.
Matud ni Reynaldo Valmoria, ang warden sa CPDRC, nga ang daku nga pondo niini alang sa pagkaon sa mga piniriso nga moabot sa P41 milyones alang sa 2,000 ka piniriso sunod tuig.
Gipasabot ni Valmoria nga nagkagamay ang mga piniriso sa CPDRC ug tinguha sa Kapitolyo nga moabot nalang kini sa 1,500 ngadto sa 1,600 nga mao gyud ang kapasidad niini.
Aprobahan pa sa hunta probinsiyal ang maong proposed budget kauban sa ubang departamento sa Kapitolyo.
Sa pikas bahin laing livelihood program ang giumol sa Cebu City Jail alang sa mga piniriso aron sila mokita bisan og naa sulod sa prisohan.
Kini mao ang pagpanghimo og bayong bags nga ginama sa PP packaging straps.
Sigun ni Jail Officer 1 Abigail Joy Tarona, Community Relation Services In-Charge sa City Jail, nga naumol ang maong programa sa nakita niya sa internet ug iyang nahuna-hunaan nga kaya kini buhaton sa mga piniriso.
Ang mga bag nga nahimo sa piniriso naabot na og baligya sa Camp Crame ug ang Bureau of Jail Management and Penology 7 nag-display niini sa usa ka mall sa tag P450 ngadto na sa P1,550. Sinemana ang pagsweldo diin ang mga piniriso makadawat og porsyento sa halin. (Decemay P. Padilla/GMR)(BANAT NEWS)
- Latest
