CEBU, Philippines – Ang pagbukas sa bag-ong merkado publiko ug ang paghawan sa kadalanan ug mga sidewalks sa Dakbayan sa Mandaue ang kabahin lang sa mga nahimo ni Mayor Jonas Cortes sa iyang unang 100 ka adlaw sa katungdanan.
Natigayon sab ang pagdonar og bag-o nga mga sakyanan ngadto sa kapolisan sa Mandaue City Police Office (MCPO) ug mga armas aron pagpakgang sa dautang mga elemento.
Kini gipadayag ni Cortes sa iyang State of the City Address niadtong Lunes nga gitambongan sa liboan ka Mandauehanon ug mga opisyal lakip nilang Bokal Jovito Thadeo Ouano, Bokal Glenn Anthony Soco ug Kongresista Emmarie “Lolypop” Ouano-Dizon.
Gipaningkamutan karon sa iyang administrasyon ang pagpaluag sa mga dalan ug pinaagi sa pagpangulo ni Architect Florentino Nimor sa Traffic Enforcement Agency of Mandaue (TEAM). Samtang si Cebu City Mayor Edgardo Labella nipadangat sab sa iyang SOCA kagahapon diin gipatambong ang nagkalainlain sector. Gusto ni Labella nga motambong ang lainlaing sektor aron mahibaw-an ug masusi nila ang iyang nahimo sa unang 100 ka adlaw isip usa ka mayor. Usa sa napatuman ni Labella ang dali nga pagnegosyo sa siyudad samtang niangkon nga aduna pay mga butang nga angayang palamboon. Gihisgutan niya ang kahimtang sa trapiko ug kalimpyo sa mga sapa. Matud niya nga dili nila masulbad ang problema sa trapiko kung sila-sila ra ang molihok ug ang kalimpyo sa mga sapa kinahanglan og pagmintenar. Gipahinumduman ni Labella ang mga opisyal sa barangay sa ilang kaakuhan ubos sa Republic Act 9003 o ang Ecological Solid Waste Management Act of 2000.
Sa Dakbayan sa Talisay, gusto ni Mayor Gerald Anthony “Samsam” Gullas nga adunay “brand” ang dakbayan. Atol sa iyang SOCA kagahapon, si Gullas nagkanayon nga ang mga tawo moadto lang sa Talisay tungod sa beach ug lechon. “Ako paglantaw sa Talisay is that we need to have a brand. What kind of city are we? Industrial? Commercial and bussiness? Cultural? We need to have a brand that all Talisaynons can be proud of,” matud sa batan-ong Gullas.Matud niya nga karon ang panahon aron makahimo og brand sa dakbayan subay sa tumong sa probinsiya sa turismo.
Si Gobernador Gwendolyn Garcia ug Kongresista Eduardo Gullas nisaad og tag P12 milyones lakip na ang pipila ka senador nga giduol sa mayor aron matuman ang plano niini sa dakbayan.
“The plan is for Talisay to be a tourism destination for families,” matud ni Gullas. Ang turismo maoy usa sa walo ka point agenda ni Gullas nga gusto niya makab-ot ug makab-ot sa iyang termino. Gawas sa turismo ug kultura, lakip sa iyang agenda ang edukasyon, disaster preparedness, sports and wellness, aftercare on the war of drugs, agriculture ug uban pa. (Mary Ruth R. Malinao, Le Phyllis F. Antojado/GMR)(BANAT NEWS)