CEBU, Philippines – Ang Department of Education (DepEd) mohatag og pahalipay sa mga magtutudlo subay niining kasaulogan sa “World Teacher’s Day” nga mahitabo karong Oktubre 5, adlaw’ng Sabado.
Ang DepEd nipagawas sa Order No. 026 series of 2019 kini mahitungod sa guidelines sa paghatag og World Teacher’s Day Incentive Benefit.
Gikompirmar kini ni Dr. Salustiano Jimenez, DepEd-7 regional director nga ang tanang magtutudlo sa pampublikong eskwelahan ang makadawat og P1,000 incentive benefit.
Matud ni Jimenez nga ang Special Allotment Release Order (SARO) downloaded na kini sa regional office.
Ang DepEd dunay 19 ka school’s division sa Central Visayas diin 10 niini sa Cebu, unom sa Negros Oriental, usa sa Siquijor ug duha sa Bohol.
Posibleng karong Oktubre 5, 2019 masulod na sa tagsa-tagsa ka ATM sa mga magtutudlo ang P1,000 nila nga incentive.
Gibana-bana nga kapin sa 65,000 ka magtutudlo sa Central Visayas ang makadawat og incentive.
Sa laing bahin, gihinangop sa mga magtutudlo sa pribado ug mga publikong tulunghaan ang gipasiugdahan nga raffle draw atol sa programa sa pagsaulog sa National Teacher’s Day kagahapon nga gipahigayon sa Hoops Dome sa Barangay Gun-ob, Dakbayan sa Lapu-Lapu.
Si Lapu-Lapu City School Division Superintendent Marilyn Andales maoy nangulo sa gipasiugdahan nga kalihokan nga gitambongan usab sa mga ginikanan, tinun-an ug mga opisyal sa kagamhanan sa maong dakbayan.
Si Mayor Junard Ahong Chan sa iyang mensahe, nagpasalamat ngadto sa mga magtutudlo tungod sa ilang pagtuman sa ilang mga kaakohan isip ikaduhang ginikanan sa kabataan.
Ang mga premyo sa raffle gilangkuban sa refrigerator, motorsiklo, motor bike, bisiklita, mga telebisyon, mga laptop nga dala na ang printer ug mga sinakong bugas. (Romeo T. Limpangog/BDB)(BANAT NEWS)