3 Bisaya buot ilakip sa national artists

CEBU, Philippines — Giduso sa pundok sa mga lokal nga maglilingaw, magsusulat ug mga magsisibya ang ilang nangamatay na nga kaubanan nga mahilakip sa talaan sa National Artists of the Philippines.

Ang mga sakop sa Lubas sa Dagang Bisaya (LUDABI) Inc. nga gipangulohan sa nasudnong pangulo nga si Atty. Leo Zaragoza ug Cebu Association of Media Practitioners (CAMP) Inc. nga gipangulohan ni Max “Daloydoy” Andrino niduso nilang Julian “Teban” Daan, Roman Tesorio “Yoyoy” Villame ug Nenita “Inday Nita” Cortez Daluz.

Ang sugyot gipasa nila kang Presidential Adviser on Legislative Affairs, Secretary Adelino Sitoy, kinsa usa ka Sugbuanong abogado ug politiko.

Si Sitoy usa sa haligi sa LUDABI ug usa sa nagsuwat sa History of the City of Cebu ug English-Cebuano Visayan Dictionary nga adunay 66,000 ka pinulongang English nga gihubad sa Cebuano-Visayan.

Si Daan, ang numero unong konsehal sa Dakbayan sa Talisay, namatay niadtong Agosto 21, 2019.

Samtang padayon siyang nagdumala sa mga drama sa radyo lakip na sa “Kung Ako Ang Pasultihon” sa dyHP-RMN Cebu 612, si Daan nakalaagad isip sakop sa Provincial Board sulod sa 15 ka tuig. Siya naila nga Esteban Escudero sa radyo ug telebisyon ug sa “Ang Manok ni San Pedro.”

Samtang si Villame usa ka mag-aawit, tigkomposo ug komedyante nga taga Calape, Bohol ug amahan sa singer nga si Hannah Villame. Si Yoyoy namatay niadtong May 18, 2007.

Nahimo siyang konsehal sa Siyudad sa Las Piñas sulod sa 10 ka tuig.

Daghang kanta nga nahimo si Villame gamit ang pinulongang Cebuano, Tagalog ug English.

Si Inday Nita naila sab nga radio drama talent ug gimahal sa mga Sugbuanon sa kabugnaw sa iyang tingug.

Nisikat si Inday Nita sa iyang kaisog sa pagsaway sa rehimeng Marcos atol sa Martial Law hinungdan nga siya gipriso.

Lakip sa gisugyot sa LUDABI ug CAMP paghingan sa dagkung proyekto sa Sugbo ngadto sa mga iladong mga personalidad.

Kini sama sa Mactan-Mandaue Bridge alang kang Senador Jesus Marino “Rene” Espina kinsa namatay niadtong Septiyembre 13, 2019.

Dihang siya gobernador sa Sugbo, si Espina gitudlo sab nga secretary sa Public Works, Transportation, and Communication niadtong Nobiyembre 1968 ug sa iyang panahon namugna ang plano sa pagtukod sa Mactan-Mandaue Bridge.

Ang Mambaling flyover sa Dakbayan sa Sugbo gisugyot nga nganlan kang Sec. Cerge Remonde; ang Transcentral Highway alang kang kanhi bise gobernador Gregorio Sanchez Jr.

Gihangyo sab sa grupo ang Commission on Higher Education nga malakip sa kurso sa kolehiyo ang Bachelor of Science in Bisayan Education, ug ilang gihangyo si Sitoy nga magbutang og CAMP ug LUDABI Center sa Dakbayan sa Sugbo. (BANATNEWS)