CEBU, Philippines — Ang kagamhanan sa Dakbayan sa Sugbo molusad sa Green Cebu City Project karong Oktubre 5, 2019.
Kini aron masugdan giplano sa siyudad nga magtanom og 3 milyones ka kahoy ubos sa termino ni Cebu City Mayor Edgardo Labella.
Matud ni Labella nga ang 5,000 ka empleyado sa city hall ug mga boluntaryo gikan sa lainlaing pribado nga sektor ang mosalmot sa massive tree planting.
Giingong 10,000 ka seedlings sa indigenous nga kahoy ang gikatakdang itanom diha sa lainlaing mga lugar sa siyudad sa sunod semana.
Si Labella nagkanayon nga ang siyudad dili motanom sa mga kahoy nga Acacia, Gimelina ug Mahogany.
Ang itanom sa siyudad mao ang mga kahoy nga Molave ug Narra ug uban pang mga lumad nga kahoy.
Gibutyag ni Labella nga ang siyudad adunay lainlaing seedlings gikan sa lainlaing nursery ug nakig-alayon usab sila sa Department of Environment and Natural Resources (DENR)-7 ug Ramon Aboitiz Foundation Inc. (RAFI) alang sa dugang nga mga seedling.
Gawas sa mga kawani sa city hall, ang Integrated Bar of the Philippines- Cebu Province nagpadayag sa ilang tinguha nga moapil sa pagpananom sa mga kahoy.
Matud usab ni Labella nga gitahasan niya ang Cebu City Environment and Natural Resources Office head Atty. John Jigo Dacua ug Engineer Editha Peros nga mao ang pangulo sa buhatan sa Parks and Playground nga moila sa mga lugar nga tamnan sa mga kahoy. (/BDB)(BANATNEWS)