CEBU, Philippines — Gimandoan ni Cebu City Mayor Edgardo Labella ang City Legal Office (CLO) nga ipaubos sa imbestigasyon ang posible nga pag-apil sa mga tag-iya sa KTV bar ug operator sa ilegal nga kalihokan lakip na niini ang human trafficking diin lakip usab sa mga biktima menor de edad.
Gimandoan usab ni Labella ang CLO nga mohimo og legal nga aksiyon batok sa establisameno kinsa nalambigit sa mga ilegal nga kalihukan.
Ang maong kamanduan kalabot kini sa anti-trafficking operation nga gipahigayon sa Philippine National Police (PNP), Department of Social Welfare and Development (DSWD), ug anti-human trafficking organization nga Destiny Rescue kaniadtong Agosto 17, 2019 sa usa ka KTV bar nga nahimuntang diha sa General Maxilom Avenue sa Dakbayan sa Sugbo.
Matud ni Cebu City Legal Officer Atty. Rey Gealon nga kinahanglan magtigom ang CLO og dugang ebidensiya gikan sa PNP aron makakab-ot sila og komprehensibo nga rekomendasiyon.
Gipasabot ni Gealon nga kinahanglan sila nga magmabinantayon sanglit ang imbestigasyon naglangkub sa mga katungod sa kabataan nga gipanaad.
“Rest assured, truth and justice will prevail”, pasalig ni Gealon. Atol sa nahisgutang anti-trafficking operation lakip ang 11 ka menor de edad sa 28 ka tawo nga naluwas.
Duha ka suspetsado ang nasikop nga sila si Jefferson Taplada, 44 ug Ricardo Saviego Deligero, 30. (/BDB)(BANATNEWS)