CEBU, Philippines – Gikabalak-an sa mga negosyante og baboy sa Sugbo ang pagnihit sa inasal panahon sa Pasko gumikan sa African Swine Fever (ASF) virus nga unang niigo sa Luzon area.
Usa ka negosyante og baboy sa merkado publiko sa Dakbayan sa Mandaue nipadayag sa niaging mga buwan karong tuiga maoy iyang mapalit ang kapin sa 100 ka baboy sa habagatang bahin sa Lalawigan sa Sugbo.
Apan sukad sa pagtumaw sa ASF, sa iyang pag-adto sa dapit maoy iyang nadala ang 20 na lang kabuok baboy.
Gisusi sab niya ang amihanang bahin diin nakadala siya og 15 na lang kabuok.
Si Konsehal Jimmy Lumapas nga maoy chairman sa committee on market sa konseho sa Dakbayan sa Mandaue niingon nga tungod kay gidili man nga makasulod sa Sugbo ang mga ihawnon nga baboy gikan sa ubang lalawigan, dili kalikayan nga magnihit ang karne sa kamerkaduhan.
Matud ni Lumapas nga sa kasamtangan dili pa kini makaepekto sa mga negosyante og karneng baboy sa kamerkaduhan sanglit aduna pa man silay napalit nga mga nagbuhi dinhi sa Sugbo.
Apan sa paglanat sa mga buwan hayan masinati ang pagnihit sa suplay.
Gumikan sa ASF virus sa Luzon area, gimando ni Gobernador Gwendolyn Garcia ang 100 ka adlaw nga total ban sa tanang pork related products gikan sa Luzon. (/GMR)(BANAT NEWS)