ABC mahinangpon sa pag-uswag sa eleksyon
CEBU, Philippines – Gihangop sa Association of Barangay Councils-Cebu City Chapter ang lakang nga pag-uswag sa eleksyon sa Barangay ug Sangguniang Kabataan.
Si ABC President ug Kamagayan Barangay Kapitan Franklyn Ong niingon nga ang paglugway sa termino sa mga opisyal sa Barangay ug SK gikinahanglan aron masunod ang dili moubos sa tulo ka tuig nga termino sa mga opisyal.
“It is a very good development kay daghan pa og mahimo ang mga barangay officials. Dili man pud pwede nga katong plan nila next year kay ma-short among term to two years. By law, we need three years to serve,” matud ni Ong.
Niadtong 2013, ang mga opisyal adunay lima ka tuig nga termino tungod ang piniliay gibalhin gikan sa 2016 hangtud sa Mayo 2018.
Nunot niini matud ni Ong nga makiangayon lang sab nga ibalhin ang eleksyon sunod tuig ngadto sa 2022 o kaha sa 2023. Ang Ubos Balay-Balauranan niaprobar sa balaudnon nga mag-uswag sa eleksyon ngadto Mayo 2023 samtang ang Senado bag-o lang niaprobar sa ikaduhang pagbasa sa balaudnon nga mag-uswag sa eleksyon sa Barangay ug SK ngadto sa Disyembre 5, 2022.
Samtang gipadayon pa ang pagtuki sa mga balaudnon, giawhag ni Ong ang tanang opisyal sa barangay nga ipadayon ang pagserbisyo sa ilang mga konstituwente. (/GMR)(BANAT NEWS)
- Latest
