CEBU, Philippines – Naghunahuna na si Cebu City Mayor Edgardo Labella sa paghulip sa mga sakop sa Board of Directors sa Metropolitan Cebu Water District (MCWD) kun magpadayon ang problema sa kakuwang sa suplay sa tubig.
Nagpadala na siya og suwat sa MCWD nga nagpahayag sa iyang pagkadismaya sa daghan na reklamo sa kakuwang sa suplay sa tubig ug gani nakasinati sab siya sa mga adlaw nga walay tubig sa iyang balay sa Barangay Mabolo.
Dihang gipangutana kun siya ba ang magtudlo ug magtangtang sa mga opisyal nga gitudlo sa niaging administrasyon sa MCWD Board, si Labella niingon nga tun-an niya ang balaud nga naghatag kaniya og awtoridad nga magtudlo sa mga sakop sa board.
Si Labella ang appointing authority sa MCWD tungod ang siyudad adunay kapin sa 75 porsyento sa mga konsumedor subay sa Presidential Decree 198.
Dugang sa mayor nga susihon sab niya ang mga termino sa kasamtangang mga sakop sa MCWD Board. Sigun sa PD 198 nga ang mga direktor mahimo nga matangtang ug mailisan kun adunay igong rason subay sa pag-review ug pag-aprobar sa Local Water Utility Administration.
Sa pagkakaron giingong ang MCWD kuwang og 20,000 cubic meter nga suplay matag adlaw. Gihimo karon sa MCWD ang pagpakigsabot sa mga pribadong kompaniya nga makasuplay kanila og tubig ug pagkawot og pagpangita og laing tinubdan.
Samtang nipadayag sa ilang kasagmuyo ang mga opisyal sa Dakbayan sa Talisay ngadto sa MCWD. Kini human sa mga reklamo sa katawhan nga wala pa gyud kahatagi og kasulbaran sa maong kompaniya.
Si Mayor Gerald Anthony “Samsam” Gullas Jr. nibutyag nga daku kaayo niyang kahibulong nga ang tubig sa MCWD gikuha sa Barangay Jaclupan ug Lagtang alang sa laing lugar apan wala kahatag og saktong suplay sa dakbayan.
Si Konsehal Socrates Fernandez niduso og resolusyon sa pagpadayag sa ilang kadismaya sa MCWD sa daghang mga rason. Samtang si Bise Mayor Alan Bucao nitataw nga daghan sila og hangyo sa kompaniya apan wala kaayo nila kini gihatagan og pagtagad.
Sila nihulagway nga pipila ka pribadong kompaniya ang gidasig sa MCWD aron mokubkob og tubig dayon sila na ang mosuplay niini ngadto sa mga konsumdedor.
“Among naobserbahan nga na-abuse gyud ang pag-extract og tubig ang Talisay,” nagkanayon si Bucao.
Gibana-bana nga naa na sa lima kapin ug kulang ang nagkubkob aron makakuha og tubig sa siyudad.
Dugang ni Bucao nga iya na kining gipatun-an sa ilang komitiba kun makahimo ba sila og legal nga lakang labot niini aron mapakgang kini nga kalihukan sa maong kompaniya. (Gabriel C. Bonjoc/GMR)(BANAT NEWS)