Talisay City Police Station gipasidunggan

CEBU, Philippines — Ang Talisay City Police Station ang napiling “Best Component City Police Station” sa tibuok Rehiyon-7 atol sa 118th Police Service Anniversary nga gipasiugdahan sa Police Regional Office (PRO)-7 niadtong niaging adlaw.

Si Police Major Orlando Carag, Jr., hepe sa Talisay City Police Station ang nidawat sa nahisgutang pasidungog.

Si Carag nipadayag sa iyang kahangop sa nadawat nilang pasidungog ug matud niya nga nagpabilin gihapon ang hagit sa pagsumpo sa mga dautan o badlongon sa katilingban.

Si Carag nipasalamat sa mga stake holder kinsa nitabang kanila aron mamentinar ang kahapsay ug kalinaw sa siyudad.

Samtang si Mayor Gerald Anthony “Samsam” Gullas, Jr. nihangop sa kalamposan sa lokal nga kapolisan ubos kaniadto ni Lieutenant Colonel Marlu Conag nga kanhi hepe sa TCPS ug kang Carag kinsa maoy kasamtangang hepe sa kapolisan sa siyudad.

Si Gullas nipadayag sa iyang dakong pagsalig kang Carag sa pagmentinar sa kahusay ug kalinaw sa siyudad.

Niining ulahi lang, ang siyudad niinugura sa bag-ong sub-station diha sa Barangay Bulacao ug Lawaan 1.

Si Gullas nipasalig usab kini sa kanunay’ng suporta ngadto sa mga programa sa  kapolisan. (/BDB)(BANATNEWS)

Mga senior citizen sa siyudad nagsumpaki ang pamahayag

Mary Ruth Malinao

CEBU, Philippines — Mga senior citizen sa Dakbayan sa Sugbo adunay mga sumpaki nga pamahayag kabahin sa P3,000 nga pinansiyal nga hinabang kanila gikan sa siyudad.

Adunay pipila ka senior citizen nga buot matag bulan nilang madawat ang ilang pinansiyal nga hinabang samtang adunay pipila usab kanila uyon nga matag tulo ka bulan madawat ang ilang hinabang.

Ang P3,000 nga tabang pinansiyal nga giapod-apod niining ulahi alang kini sa bulan sa Hulyo hangtud Septiyembre.

Si Francisco Labares, 70-anyos, nipadayag sa iyang kalipay tungod sa iyang nadawat nga tabang pinansiyal.

Si Labares nipadayag sa iyang pag-uyon nga makuha ang iyang pinansiyal nga tabang matag tulo ka buwan.

Sama kang Labares ang 72-anyos nga si Robert Niñal uyon usab nga matag tulo ka bulan madawat ang iyang pinansiyal nga hinabang.

Matud ni Niñal nga labing maayo nga tingob nga madawat ang ilang hinabang tungod kay kong binuwan P1,000 lang ang ilang madawat diin dili kini kapaigo alang sa mga tambal nga iyang pamaliton.

Samtang si Ricardo Montes, residente sa Barangay Kalubihan nipadayag nga buot niyang matag bulan nga madawat ang ilang pinansiyal nga hinabang.

“Dugay kaayo ang tulo ka buwan. Maayo nang one month kay aron atong magamit dayon deretso sa atong mga kinahanglan”, matud ni Montes.

Mahimo pa gihapong makuha sa mga kwalipikadong senior citizen ang ilang tabang pinansiyal diha sa City Treasurer's Office sa Cebu City Hall sulod sa 10 working days o hangtud sa Oktubre 4, 2019 nga makuha sa senior citizen ang ilang pinansiyal nga tabang gikan alas 8:00 sa buntag  hangtud alas 3:00 sa hapon. (/BDB)(BANATNEWS)