Barko nga nitakilid sa isla sa Camotes gi-dry dock na

CEBU, Philippines — Naguyod na kadtong roro vessel nga nitakilid sa pantalan sa Consuelo Port, San Francisco, Isla sa Camotes kagahapon sa buntag.

Matud sa tigpamaba sa Philippine Coast Guard 7, Lt. JG Michael Encina, nga niabot niadtong Lunes sa hapon ang tugboat apan kagahapon sa buntag lang nila gihimo ang towing operation isip kabahin sa ilang safety measures tungod kay mas kalma ang dagat itandi sa hapon.

Alas 7 kagahapon sa buntag naguyod sa tugboat nga Joshmar 2 ang MV Island Roro 1 gikan sa pantalan sa Consuelo paingon sa Dragon Fastcraft Builders Inc. sa Barangay Labogon, Siyudad sa Mandaue.

Si Encina niasoy nga wala’y kadaut nga namugna sa maong insidente samtang duna sila’y coastguard divers ug mga divers nga gi-hire sa tag-iya sa barko nga nagpahigayon og underwater hull inspection ug nisusi sab sa fuel passage kun possible ba nga dunay oil spill.

“Pero prior to towing operation naman one of our requirements talaga as part of our safety measures is yung siphoning ng remaining diesel oil yung 3,000, na siphon naman siya lahat they already secured yung SPN from MARINA, the special permit to navigate, we allow the vessel to be towed,” asoy ni Encina.

Nasuta nga ang PCG-7 nihimo na og imbestigasyon labot sa maong hitabo diin nakita nga ang cargo nag-slide sa starboard side sa barko nga maoy hinungdan nga nitakilid kini sa tuo nga bahin.

Mahitungod sa liabilities, si Encina nisaoy nga ang Maritime Industry Authority duna say kaugalingong imbestigasyon nga gihimo dungan sa pagbutyag nga ang ilang imbestigasyon nakatutok sa development sa dugang protocols ug safety measures nga ipatuman sa umaabot aron malikayan ang nahitabo sa Consuelo Port.

“One of the additional protocols na pina-follow ngayon and they strictly observing is yung pagsunod natin na dapat pag nagkakaroon ng embarkation mauuna muna yung mga cargo followed by the passenger tapos pag-disembarkation naman mauuna yung passengers followed by cargo plus we also the shipping company observe and gina-guide naman natin sila dun sa proper storage location ng mga cargoes nila,” dugang ni Encina.

Ang pagpalutaw ingon man pagguyod sa barko nilanat lang og napulo ka adlaw nga gihulagway ni Lt. JG Encina nga paspas ug ilaha kining gikalipay tungod kay kung nadugay kini hayan makamugna gyud kini og kadaut sa pantalan ug kadagatan. (GMR) (BANAT NEWS)