CEBU, Philippines – Usa ka lapad nga operasyon batok sa mga malapason sa lagda sa trapiko ang gipahigayon sa Inter-Agency Council for Traffic (I-ACT) kagahapon sa buntag diha sa V. Rama Avenue, Barangay Guadalupe, Dakbayan sa Sugbo.
Ang I-ACT gilangkuban kini sa Land Transportation Franchising and Regulatory Board (LTFRB), Land Transportation Office (LTO), Highway Patrol Group (HPG), Philippine Coast Guard ug uban pa.
Ang mga motorista lakip na ang nagmaneho og pribadong sakyanan nga nakalapas sa lagda sa trapiko ang naisyuhan og citation ticket.
Ang maong mga motorista adunay naggamit kanila og cellphone samtang nagmaneho, wala mag-seat belt ug nag-overload ang drayber sa garbage truck sa maong barangay, mga walay klaro nga helmet nga nagsakay og motorsiklo ug overloaded kay nagkarga pa og gagmay nga bata ug adunay nagpatak og parada sa ilang sakyanan.
Matud ni Colonel Manuel Bonnevie, team commander sa I-ACT ikaduha na kini nilang hiniusa nga operasyon nga ang national nga grupo ang nihimo niini dinhi sa Sugbo diin ang una niadtong buwan sa Nobiyembre sa nilabay’ng tuig.
Gibutyag ni Bonnevie nga ang ilang gihimo tubag kini sa panawagan sa katawhan nga mohimo usab sila og laing operasyon sa I-ACT dinhi sa Sugbo.
Si Bonnevie niawhag usab sa katawhan nga motabang sa ilang operasyon tungod kay alang kini sa kaayohan ilabi na sa mga commuter nga magbiyahe matag adlaw.
Lakip sa gisusi sa I-ACT ang tanang parte sa sakyanan kong wala ba kini kalapasan lakip usab ang aso niini kong dili ba makahatag og kadaut sa kalikupan. Gidasig ni Bonnevie ang mga naisyuhan og ticket nga moadto sa rehiyonal nga buhatan sa LTO-7 aron ilang i-settle ang ilang balayronon. (/BDB)(BANAT NEWS)