Magsakyanan molabay basura sa mananga
CEBU, Philippines — Gi-monitor sa mga opisyal sa Barangay Tabunok, Dakbayan sa Talisay ang mga magsakyanan nga giingong molabay og basura sa sapa sa Mananga.
Si Kapitan Benjie Cabigas nakadawat og reklamo labot sa mga tawo nga magsakyanan nga magdala og sinakong basura ug ilabay sa sapa sa Mananga.
Asoy pa niya nga ang modus ilang himoon sa gabii o sa kaadlawon.
Gumikan niini si Cabigas nimando sa iyang mga sakop sa pag-monitor sa mga hugawan.
Iya sab gihangyo ang nagpuyo sa lugar nga mopahibawo dayun kun aduna man gani silay masakpan.
Sigun pa niya nga nakig-alayon na sab siya sa kapolisan aron kun masakpan ila gyud kining dakpon ug pasakaan og kaso.
Sayo niini si Talisay City Mayor Gerald Anthony “Samsam” Gullas Jr. nipagawas og kamanduan aron sa pagpahigayon og sinemana ug binuwan nga pagpanglimpyo sa kasapaan sa pagsugod gyud niya og lingkod isip mayor.
Si Cabigas nidugang nga pinaagi sa purok system ang katawhan sa lugar mao na sab ang ilang kaabag aron mapadayon nga limpyo ang ilang mga lugar. Usa kini sa pamaagi nga gibalik ang volunteerism sa katawhan. (GMR) (BANATNEWS)
- Latest
