CEBU, Philippines — Ang kagamhanan sa Dakbayan sa Lapu-Lapu nihatag og lugway sa oras sa serbisyo sa Outpatient Department sa Lapu-Lapu City Hospital.
Si Atty. Jeannify Tan-Dungog, administrator sa maong tambalanan nibutyag nga gilugwayan nila hangtud sa alas 10:00 sa gabii ang serbisyo sa OPD sa Lapu-Lapu City Hospital.
Kini human nila nabantayi nga daghang pasyente ang dili nila matagad sa pag-abot sa cut-off nilang oras nga alas 5:00 sa hapon.
Ang OPD sa Lapu-Lapu City Hospital magsugod og dawat og pasyente sa alas 8:00 sa buntag hangtud lang sa alas 5:00 sa hapon gikan sa adlaw’ng Lunes hangtud sa Biyernes.
Matud ni Dungog nga ang paglugway sa oras sa OPD sa Lapu-Lapu City Hospital usa sa mga paagi nga kahatagan og tukmang pag-atiman ang mga pasyente.
Niadtong Septiyembre 2, 2019 gipahigayon ang dry run alang sa bag-ong schedule sa OPD sa tambalanan.
Sugod usab karong adlawa ang OPD bukas sa pagdawat og pasiyente sa alas 8:00 gihapon sa buntag hangtud sa ala 1:00 sa hapon ug hangtud na usab kini sa alas 6:00 sa gabii.
Dugang ni Dungog nga padayon usab nga kapahimuslan sa mga kabus nga mga Oponganon ang libre nga pagpatambal ug libre nga consultation services diha sa nahisgutang tambalanan. (/BDB)(BANATNEWS)