CEBU, Philippines — Sa dili madugay ang mga gagmay nga negosyo sa Siyudad sa Sugbo ang exempted na sa pagbayad sa buhis.
Kini kung sa higayon maaprobahan na ang gisugyot nga lakang alang sa maong katuyoan.
Si Konsehal Eugenio Gabuya, Jr. nagkanayon nga kadtong i-exempted mao kadtong adunay P10,000 nga start-up capital o negosyo nga dili molapas sa P50,000 nga tinuig nga gross receipt.
“It is for the paramount interest of the residents of Cebu City to grant small and home-based owners reprieve from paying business taxes,” sigun niya.
Apan ang kadtong mga mamaligya og sigarilyo ug mga ilimnon ang dili maka-avail sa maong exemption.
Bisan exempted sa pagbayad sa buhis, sigun ni Gabuya nga kini nga mga negosyante gimandoan gihapon nga mokuha og permit sa siyudad. Dugang niya nga adunay mga regulatory fees nga kolektahon gikan sa mga tag-iya sa negosyo aron pagtuman sa mga nahauna nga mga balaud ug ordinansa.
Sigun ni Gabuya nga kadaghanan sa kababayen-an nga nagpuyo sa siyudad nagbutang og gamay nga negosyo sa puy-anan aron madugangan ang kita sa ilang pamilya.
Giingon niya nga ang pagbaliwala sa pagbayad sa buhis makapa-uswag sa panginabuhi ug aron mapaayo ang kalidad sa kinabuhi alang sa tanan nga mga residente sa siyudad. Gipasabot ni Gabuya nga ang magpatuman nga opisina mao ang Business Permit ug Licensing Office sa siyudad subay sa tanang lagda ug regulasyon aron matuman ang mga probisyon sa giduso nga ordinansahon. Ang tinguha gitun-an pa sa committee on laws, ordinances, and styling ingon man sa committee on budget and finance aron makahatag sila og rekomendasyon niini. (/GMR)(BANATNEWS)