Bangga sa motor 3 patay, lola naligsan patay

CEBU, Philippines – Tulo ang patay sa disgrasya sa kadalanan sa Barangay Malhiao, Badian niadtong Martes sa gabii.

Ang mga nakalas mao ang drayber sa motor nga si Jonard Abistano, 23, taga Barangay Banhigan sa maong lungsod ug laing drayber sa motor nga si Michael Oriente, 16, taga Poblacion, Moalboal, ug sakay niini nga si Jasper Bacalangco, 16, parehong tinun-an sa grade 10 nga taga Malabagon, Moalboal.

Samtang angol ang laing angkas ni Oriente nga si Desiree Anor, 16, residente sa maong lugar.

Matud ni Police Corporal Tirso Sol, desk officer sa Badian Police Station, nga nagkabangga ang duha ka motor nga niresulta sa pagkalagpot sa mga sakay.

Ang biktima nga si Abistano patay diha-diha samtang sila si Oriente ug Bacalangco nadala pa sa tambalanan diin didto nakutloan sa kinabuhi.

Bugtong si Anor lang ang nakalingkawas sa aksidente kinsa nakaangkon usab kini og bun-og sa lawas. Samtang patay ang usa ka senior citizen kinsa naligsan sa usa ka sakyanan sa South Road Properties, Barangay Lawaan 1, Dakbayan sa Talisay niadtong Martes sa gabii.

Ang biktima nailhan nga si Zaida Lequigan, 63, taga Barangay Linao sa maong siyudad, samtang ang drayber nga nakaligis mao si Ruben Sumalinog, 51, taga Barangay Labangon, Siyudad sa Sugbo.  Si Patrolman Eufemio Padillos sa traffic division nagkanayon nga padulong sa Siyudad sa Sugbo si Sumalinog dihang wala kabantay nga nilabang si Lequigan kinsa nalabay ug napantok sa sementadong karsada.

Matud ni Sumalinog nga ngitngit ang dapit hinungdan nga wala siya kabantay sa biktima nga nitabok sa karsada.

Si Jonathan “Joy” Tumulak, traffic czar sa Siyudad sa Talisay, nitataw nga kusog-kusog gyud ang dagan ni Sumalinog tungod kay nag-apas kini sa meeting sa iyang amo nga Hapon.

Kagahapon si Padillos nitug-an nga ilang nakustodiya si Sumalinog apan aduna nay inisyal nga pakigsabot sa pamilya sa namatay nga sabutan nalang ang hitabo tungod kay disgrasya man kini. (Gabriel C. Bonjoc/GMR)(BANAT NEWS)