CEBU, Philippines — Nailhan na sa kapulisan sa Lungsod sa Minglanilla ang responsable sa kamatayon sa ilang kauban nga si Police Senior Sergeant Alfredo Pagaling.
Si Police Master Sergeant Gilmer Noval nibutyag nitugma ang pamahayag sa saksi ug sa nakuha sa CCTV camera atol sa pagpusil sa nagmotorsiklong lalaki sa patrol car nga gisakyan nila ni Pagaling.
Si Pagaling naa sa driver seat sa patrol car nga nagparada kilid sa karsada samtang nagpaabot sa iyang mga kauban aron magpahigayon og checkpoint. Apan duha ka lalaki nga nagsakay og motorsiklo ang kalit nga namusil.
Si Pagaling naigo sa walang tampihak ug nilapos ang bala sa tuong bahin sa ulo hinungdan sa iyang kamatayon. Si Noval nagkanayon nga sa wa pa kini nahitabo, aduna sab nahitabong pagpamusil sa Dakbayan sa Talisay may labot sa fraternity. Ang saksi nitumbok nga ang nakita sa CCTV nga namusil sa patrolcar mao sab namusil sa Talisay. Gituohan nga nakuratan ang namusil tungod kay sa ilang pagsibat nakita nila ang patrolcar ug nagtuo kining sila maoy giatangan didto. (IBM) (BANATNEWS)