Monitoring batok sa mga baboy ug produkto niini pahugtan
CEBU, Philippines – Gitinguha ni Gobernador Gwendolyn Garcia nga mas pahugtan ang pagbantay ug monitoring sa mga pantalan ug tugpahanan sa lalawigan paglikay nga adunay makasulod nga bisan unsa nga produkto sa karneng baboy subay sa gipatuman nga ban sa tibuok probinsiya.
Atol sa Provincial African Swine Fever Task Force meeting kagahapon nasayran ni Garcia nga ang Cebu Port Authority (CPA) ug Mactan Cebu International Airport (MCIA) wala makadawat sa Executive Order Number 14 nga nag-ban sa mga binuhing baboy ug bisag unsa mga produktong baboy nga makasulod sa Probinsiya sa Sugbo sulod sa 100 ka adlaw.
“I’m quite disturbed that MCIA and CPA just received the copy of EO 14, this is a matter of utmost urgency. We are primarily relying on the CPA and MCIA”, matud ni Garcia.
Si Garcia nagpatawag sa maong tigom aron ma-update sa gihimong monitoring sa tibuok lalawigan human gipatuman ang ban niadtong Agosto 22.
Matod ni Dr. Mary Rose Vincoy, provincial veterinarian nga adunay 100 ka binuhing baboy lakip na sa 11 ka kabawo ug 11 ka baka ang ilang nadakpan niadtong Domingo diha sa Hagnaya Port sa Lungsod sa San Remigio.
Ang maong mga hayop nga giingong gikan sa Probinsiya sa Masbate dalhon unta diha sa ihawan sa Dakbayan sa Mandaue apan gipabalik kini og biyahe padulong sa maong probinsiya human nasakpan sa monitoring team sa Provincial Veterinary Office uban sa Philippine Coast Guard.
Matud ni Vincoy nga tampered ang permit sa maong mga baboy.
Sa mga kompaniya ang Metro Retail Stores Group, Gaisano Country Mall, Landers, Philippine Seven Corporation, Collonade Supermarket, Rustans ug Fooda ang nakahatag og inventory ilang mga produkto sa karneng baboy. Sa maong mga kompaniya ang Metro ug Gaisano Country Mall lang ang nakatahan sa ilang pork products. Ug matud ni Garcia nga subject sa disposal ang maong mga produkto. (/BDB)(BANAT NEWS)
- Latest
