Mananagat, panday gipamatay sa Daanbantayan

CEBU, Philippines – Patay ang 34-anyos nga mananagat nga natulog kauban sa iyang asawa ug lima ka anak dihang kalit lang gisaka sa nagtaptap nga duha ka lalaki ug gipusil alas 10 pasado sa niaging gabii sa Bakhawan, Lungsod sa Daanbantayan.

Si Patrolman Socrates Bacalso sa Daabantayan Police Station niila sa biktima nga si Ronie Dilao. Matud ni Bacalso nga gipugos pagsulod sa duha ka armado nga lalaki ang panimalay ug dihang naseguro na nga patay na ang biktima daling nisibat ang mga mamumuno.

Samtang patay sab ang usa ka construction worker nga gibunalan og tubo nga puthaw sa kauban niya sa trabaho sulod sa gikatulgan niining bunk house sa construction site nga ilang gitrabahoan sa Barangay Paypay sa maong lungsod.

Si Bacalso niila sa biktima nga si Golven Maglasang, 49, lumad nga taga Lungsod sa Tuburan. Ang suspek mao si Dodo Pagalan, hingkod, lumad nga taga Calatrava, Negros Occidental kinsa dali nga nisibat human sa hitabo. (/GMR)(BANAT NEWS)