CEBU, Philippines – Isip kabahin sa tinguha nga pagsigurong lapad ang maabot sa mga mahinungdanong impormasyon nga angay mahibaw-an sa katahawn, ang Presidential Communications Operations Office(PCOO) pinaagi sa Freedom of Information-Project Management Office(FOI-PMO) nagpahigayon og PCOO Roadshow ug Freedom of Information(FOI) Campus Caravan sa Cebu Normal University kagahapon.
Kini pinaagi sa pakig-alayon sa Philippine Information Agency Region-7, Cebu City Government CNU School administration.
Gituki ni PCOO Assistant Secretary ug FOI Program Director Atty. Kristian Ablan ang FOI program, ang landmark policy sa Duterte Administration nga mopatigbabaw gyud ang katungod sa katawhan ubos sa Konstitusyon apil na niini ang katungod sa impormasyon basta kinahanglang masayran sa publiko.
Si Presidential Task Force on Media Security Executive Director Joel Sy Egco mipasabot sab sa inisyatitiba sa gobiyerno pagpanalipod sa kagawasan sa pagpadayag ug proteksyon sa mga sakop sa media ug sa mga nagtrabaho sa maong industriya.
“You know, very important ito kasi direct engagement with the grassroots, always remember na unlike before, ako kasi I covered Malacañang since 1995 so ngayon lang ako nakakita ng mga taga PCOO na bumababa sa grassroots. Diretso kasi ang hirap talaga na mag-send ng message across kung ang ating aasahan lang of course ‘yung government media platforms natin,” asoy ni Egco.
Samtang atol sa FOI Campus Caravan, gipasabot ni Ablan sa miyembro sa academe ang FOI program diin gi-highlight niini ang importansiya sa panukiduki ug pagtuon.
Gikuyogan siya sa representante gikan sa Dangerous Drugs Board mao nga apil sa gidiskusyononan ang Philippine Anti-illegal Drug Strategy sa kasamtangang administrasyon.
Sa uwahing bahin sa FOI Campus Caravan, si Ablan ug CNU President Dr. Filomena Dayagbil mipirma og Memorandum of Understanding alang sa implementasyon sa FOI Program diha sa ilang unibersidad ug misaksi niini ang mga opisyales sa PCOO, City Government sa Cebu ug CNU.
Ang FOI-PMO nagpadayon sa pagugmad og mga estratehiya aron maabot pa gyud sa kinaubsang hut-ong sa katilingban ang mga mahinungdanong impormasyong kinahanglang nilang masayran.
Apil sab niini ang pagsigurong kanunay nga mopatigbabaw ang constitutional right sa katawhan aron pag-access sa government information. (/IBM)(BANAT NEWS)