Pamilya sa CEO sa investment scam nanglayas

CEBU, Philippines — Pamilya sa gipatay nga CEO sa usa ka gikatahong investment scam company giingog nangahadlok mopakita sa publiko maong walay mi-claim sa patayng lawas niini.

Samtang ang direktor sa Cebu Provincial Police Office nga si Police Colonel Roderick Mariano miluwat og direktiba sa kapolisan sa pagpangita sa nag-AWOL (absence without official leave) nga polis ug ang asawa niini kinsang gituohang mga persons of interest sa maong pagpatay.

Kahinumduman nga niadtong Agosto 20 sa gabii, adlaw nga Martes, didto sa daplin sa Transcentral Highway, Sitio Buli, Barangay Cansumoroy, Balamban nakaplagan nga patay ug gibinaklid ang biktima nga si si Armando Bernaldez Oppus,34, lumad nga taga Davao City.

Aduna kini mga samad pinusilan ug gitabonan pa og boxer shorts ang nawong niini.

Sa silingang barangay, sa barangay Sunog napalgan ang gituohang Sports Utility Vehicle sa biktima nga gisunog na ug natagak pa gyud sa pangpang sa maong barangay.

Hangtud karon wala pay matumbok nga responsible sa maong krimen ang kapolisan.

Sa imbestigasyon sa kapolisan, giingong mibiya sa Davao City ang biktima kauban ang nag-AWOL nga polis ug ang asawa niini. Ang magtiayon giingong kasosyo ni Oppus sa maong investing company.

Kini maoy hinungdan nga sila maoy gitumbok nga persons of interest sa maong kaso.

“My directive to the police is to conduct thorough investigation, verify every information received,” sigun sa maong direktor.

Nanawagan ang maong direktor sa kabanay sa biktima nga mopatim-aw sa ilang buhatan aron mahipos ang lawas ni Oppus ug ingon man motabang sa imbestigasyon.

Gisusi na sa kapolisan ang panimalay sa biktima didto sa Davao City apan gikatahong abandonado na kini.

Giawhag sab sa maong direktor ang maong magtiayon kun buot nilang malimpyo ilang pangalan.

Ang hepe sa Balamban Police Station nga si Police Major Christian Torres nagkanayon nga hangtud niining pagsuwat, wala pa gihapon ma-claim ang patayng lawas sa biktima didto sa punerarya.

Butyag niya nga adunay nanawag sa ilaha nga nagpailang uyoan nga polis sa maong biktima kinsang nagbase sa Davao City ug giingong siya maoy mokuha sa lawas sa biktima.

Matud pa nga wala na sab ang immediate family ni Oppus didto sa Davao City sukad nga miboto ang isyu kabahin sa investment scam nga gipangulohan ni Oppus.

“Ingon ‘tong uyoan nga polis, sa Tuburan kuno nila ilubong. Ang problema dili na pwede i-release kay dapat ana ang immediate family man,” sigun ni Torres.

Samtang ang Regional Anti-Cybercrime Unit 7 nagkanayon nga sa ilang datos, wala silay nadawat nga reklamo nga nabiktima sa investment scam sa biktima sanglit Davao- based ang kompanya niini.

Matud ni Torres nga dako ang posibilidad nga taga Davao City ra sab ang mga nagpatay sa biktima. (/IBM)(BANATNEWS)