CEBU, Philippines – Nagpagawas og advisories pinagi sa text blast ang Office of the Civil Defense aron maalerto ang publiko ug mga local Disaster Risk Reduction and Management Officers mahitungod sa bagyong Ineng. Matod sa pangulo sa Training Section sa OCD-7 Dennis Atto, kagahapon sa alas 4 sa kadlawon sila nagpadala sa advisory.
Sigon ni Atto dili direktang maapektuhan ang Central Visayas sa tropical storm Ineng apan gumikan sa enhanced Southwest Monsoon kun Habagat mao ni ang maghatag og moderate ngadto na sa heavy rainfall sa Central Visayas.
“Ato sila gina-warn about aning epekto sa hanging Habagat nga sometimes moderate again rainfall sometimes naay heavy rainfall katong flood prone areas mao to atong bantayan nga kung possibly nga naay maka-receive ta og heavy rainfall warning so possible na nga naay evacuation so mao nay usa sa atong pangandaman ang of course dili lang untang Local Government Units but also ang mga communities nato labi na katong nagpuyo again sa Hazard prone areas, landslide prones areas, mga flood prone areas”, asoy ni Atto. Sugod niadtong adlaw’ng Miyerkules ang OCD-7 nag-monitor sa upat ka probinsiya sa Rehiyon Siete nga naglangkob sa Cebu, Bohol, Siquijor ug Negros Oriental ug wala ra sila’y nakuha nga report nga dunay panghitabo mugna sa pagsigi og uwan. Gihimug-atan ni Atto aron malikayan ang mga dili maayong insidente sama sa landslide ug uban pa kinahanglan magmatngon ug mabinantayon sa palibot.
“Pinakauna og tanan magsugod gyud sa pamilya, sa community, kaning gitawag nato og risk assessment ilang tan-awon ilang lugar if kanang ilang lugar prone ba to a certain disaster or hazard, landslide ba ron or flood and of course kung makakuha sila og information gikan sa warning agencies kaning PAGASA, Phivolcs nato nga kung naa na gani mga possible nga threat so mismo na ang mag-warn sa ilang kaugalingon dili ni sila maghuwat pa og mga warning agencies pa in the event nga previous experiences nato maghuwat pata og warning agencies pero sometime ulahi na ang tanan ba,” dugang ni Atto.
Pipila ka mga biyahe sa sugbo ug bohol ang nikanselar sa ilang biyahe human sa gale warning nga giluwatan sa PAGASA tungod sa bagyo.
Ang tigpamaba sa Coastguard na si Lt. Junior Grade Michael John Encina nga nahinabi sa Banat News miingon nga wala palargaha ang mga barkong ubos sa 250 gross tons.
Sumala pa ni Encina, ang MBCA Junmar 2 gikan sa Pilar Port padulong sa Ormoc ang nikanselar sa ilang biyahe lakip usab ang MBCA Apekop Oslob padulong sa Panglao Bohol.
Samtang gitug-an ni Encina ang MBCA San Isidro gikan Ubay to Bato Leyte, MBCA Leopards Ubay ngadto sa Hilongos Leyte ang nikanselar usab sa ilang biyahe. Wala hinoon silay natala nga na stranded sa maong mga nakanselar nga biyahe. (Rowena Capistrano/IBM)(BANAT NEWS)