CEBU, Philippines – Establisamento sa Banilad Town Center sa Cebu City nga nibaligya og ilimnong makahubog sa 16 anyos nga giingong nagpakamatay pinaagi sa pagambak sa Marcelo Fernan Bridge sa Dakbayan sa Mandaue imbestigahan sa kapolisan.
Nasayran nga ang 16 anyos nga batan-on nga si Christian Joseph Durano Lumapas napalgang naglutaw ug wala nay kinabuhi sa usa ka shipyard sa Barangay Opao, Dakbayan sa Mandaue niadtong Domingo sa buntag.
Kapin 30 ka oras kini napalgan human gideklarar nga na- missing. Sa pagsubay sa mga CCTV, nakita nga naginusarang naglakaw ang maong batan-on ug milayat dayon sa maong taytayan.
Ang direktor sa Cebu City Police Office nga si Police Colonel Gemma Vinluan miingon nga base sa ilang nadawat nga impormasyon nakig-inom ang maong batan-on sa iyang mga higala diha sa usa ka tindahan sa Banilad Town Center. Dakong posibilidad nga hubog kini dihang milayat sa maong taytayan.
“Yung isang bata na nagpakamatay, galing ‘yun sa Banilad Town Center, na nakikipag-inuman, eto ang gusto kong kwestyunin, bakit kayo nagbibigay ng mga alak sa mga teenagers?” sigun sa colonel.
Bahad niini nga mangalap sila og mga lig-ong ebidensya batok sa maong establisamento aron mapasakaan og kasong child abuse.
Matud pa nga warning kini sa mga tindahan nga mamaligya og mga ilimnong makahubog sa mga batan-on.
“Pag ako nakakuha ng reference sa inyo at evidence, kakasohan ko kayo. Kaya mamili kayo, mamuhay kayo dito sa Cebu City ng tama, kumita kayo ng tama,” bahad sa maog direktor. (/IBM)(BANAT NEWS)