CEBU, Philippines — Gisikop ang taxi driver human maoy gitumbok nga kunsabo sa pagpanulis sa nagdala sa payroll sa usa ka construction firm sa Dakbayan sa Sugbo niadtong Sabado sa hapon sa dalan A. Bonifacio, Barangay Tinago.
Nadakpan sa hot pursuit operation sa kapolisan sa garahe sa taxi sa Poblacion, Cordova ang suspek nga si Dionelito Ople, taga Dakbayan sa Mandaue.
Atol sa pagdakop nakuhaan pa gyud kini og usa ka paltik nga kalibre .980 pistol samtang wala na narekober sa kapolisan ang kwarta nga tinulis.
Matud sa hepe sa Waterfront Police Station, Police Major Joemar Pomarejos, nga natumbok sa ilang imbestigasyon nga kakunsabo sa riding-in-tandem ang maong drayber
Kini human nasayrui nga sa wala pa nahitabo ang krimen, nag-atang na kini sa maong lugar ug gani nag-una kini sa Toyota Innova nga gisakyan sa mga biktima maong wala maka-abante dayon dihang gitulis na sa riding-in-tandem.
Pag-abot sa unahan, giingong nanaug sa motorsiklo ang nag-angkas nga suspek kinsa maoy nagdala sa kwarta ug dayon nibalhin og sakay sa taxi.
Matud ni Pomarejos nga nakakita pa ang usa sa mga biktima nga nikanaug ang drayber sa taxi dihang nahitabo ang pagpanulis.
“Daghan mi og ebidensya nga mag-point nga usa gyud siya sa mga suspek,” sigun sa hepe.
Niadtong Sabado sa hapon gitulis ang nagdala sa payroll sa Landtraders World Properties Corporation.
Sulod sa Innova nga sakyanan ang company driver nga si Jonas Yusores; mga human resource officers nga sila si Junny Caramba ug Romel Condes; company cash custodian nga si Pio Cabahug; admin officer nga si Dino Flores; ug ang security guard nga si John Sanico.
Sakay ang mga suspek sa itom nga Honda XRM ug malampuson niining nadala ang P106 mil nga pangsweldo unta sa ilang mga empleyado.
Si Pomarejos nagkanayon nga kasamtangan pa nilang gisubay ang motibo sa krimen ug daku ang ilang pagtuo nga giplanohan gyud og maayo ang krimen samtang wala sab nila gisalikway ang anggulo nga inside job kini.
Sa pagkakaron, pasakaan og kasong robbery ug illegal possession of firearms ang dinakpang taxi driver samtang giila pa sa kapolisan ang riding-in-tandem.
Niadtong Agosto 13 gitulis sab ang head guard sa usa ka subdivision kinsa nagdala og dili mominus P300 mil nga aron unta isweldo sa mga security guards.
Ang suspek giila nga si kanhi Police Corporal Jobie Antipolo kinsa napatay sa wala pa mailhing tawo nga nipusil niini sa dayun sibat.
Dali sab nadakpan sa kapolisan ang tulo ka gituohang kakunsabo nga sila si Rico Acosta, 38, intelligence officer sa usa ka mall sa Dakbayan sa Sugbo ug taga San Vicente, Liloan; nagdala sa kwarta nga si Pepe Arila Acosta, 48, uyoan ni Rico nga usa ka habal-habal driver nga taga Barangay Maglasang, Consolacion; ug ang gitumbok nga utok sa krimen nga si Mark Ungaria Vergara, 28, kanhi guwardiya sa Sarsalejo Security Agency, ug graduating student sa kursong criminology ug residente sa Casili, Consolacion. (GMR) (BANATNEWS)