CEBU, Philippines — Gipabantayan na sa Police Regional Office 7 og kapolisan ang Mandaue-Mactan Bridge ug Marcelo Fernand Bridge aron masanta ang buot nga moambak sa maong mga taytayan.
Kini human gikompirmar sa PRO-7 nga walay foul play ang pagkamtay sa 16-anyos nga atleta ug giingong problema sa pamilya ang hinungdan sa pagpakamatay niini.
Matud sa direktor sa PRO-7 nga si Police Brigadier General Debold Sinas nga nilayat gyud sa taytayan ang batan-on tungod sa gidala nga bug-at nga problema.
“Starting gabii naay guwardiya sa tunga gyud, akong guidance sa ilaha mag-blinker gyud aron makahibaw ang mga tawo nga naay nagbantay,” sigun sa heneral.
Nasayran nga kapin 30 ka oras human gideklar nga missing ang tinun-an ug atleta, napalgan kini nga naglutaw ug wala nay kinabuhi sa shipyard sa Barangay Opao, Dakbayan sa Mandaue niadtong Domingo sa buntag.
Sa pagsubay sa mga footages sa close circuit television (CCTV) cameras nakita nga nag-inusarang naglakaw ang batan-on ug nilayat sa taytayan.
Matud ni Sinas nga kini ang lig-ong ebidensya nga walay foul play sa pagkamatay sa maong batan-on.
Samtang alang sa mga suicidal nga tawo o kun adunay nailhang suicidal, mamahimong manawag sa Tawag Paglaum Centro Bisaya, usa ka 24/7 suicide prevention ug crisis intervention hotline: 0939-937-5433; 0939-936-5433 ug 0927-654-1629. (GMR) (BANATNEWS)