CEBU, Philippines — Kanhi seaman patay samtang naangol ang drayber niini human sila banhigi kagahapon sa hapon diha sa Barangay Pajo, dakbayan sa Lapu-Lapu.
Ang nakalas giila sa kapolisan nga si Irving Querubin, 49, residente sa Barangay Basak, sa maong dakbayan. Samtang ang drayber nga na-angol giila nga si Niel Costanilla, 45.
Sigun pa sa direktor sa Lapu-Lapu City Police Office nga si Police Colonel Carlito Baja nga gikan mitambong og hearing si Querubin sa kasong illegal nga drugas. Matud ni Baja, nadakpan sa buybust operation si Querubin niadtong Agosto 1 ning tuiga. Migikan sila sa Lapu-Lapu City Hall of Justice sakay sa Toyota Vios, samtang nagsubay sa ML Quezon, National Highway sa Barangay Pajo, pagabot dapit sa may pension house giingong gitaparan sila og usa ka pares nga riding-in-tandem.
Gipaarakan dayon sa mga sakay sa mga motor ang mga biktima ug pagkahuman daling misutoy palayo sa dapit.
Dali nga gidala sa tambalanan si Querubin apan matud pa nga gideklarar kini nga dead on arrival samtang naigo sa paa si Costanilla. Matud pa ni Baja, nagduda silang may kalambigitan sa kaso ni Querubin ang pagpatay kaniya. (IBM) (BANATNEWS)