LTO-7: Plaka ug RFID target mahatag dayon

CEBU, Philippines — Wa nay backlog sa tanang transaksyon sa mga bag-ong girehistrong mga sakyanan sumala pa sa direktor sa Land Transportation Office-7 nga si Victor Caindec.

Matud pa ni Caindec ang mga tagiya sa mga sakyanan mahimo ng mangutana sa gipalitan nila sa ilang mga sakyanan o ca dealers sa kopya sa ilang mga Certificate of Registration and Official Receipt (OR & CR). Sa Kapihan sa LTO, si Caindec miingon nga ilahang paningkamotan nga sugod sa Oktubre karong tuiga, ang matag sakyanan nga bag-ong mapalit gikan sa mga car dealers kompleto na og dokumento apil na ang Radio Frequency Identification (RFID) ug plaka niini.

Sumala pang Caindec ang RFID  diha lang sa ilang rehiyonal nga buhatan himuon dili parehas sauna nga didto gyud kini printahon sa Manila.

Malaumon si Caindec nga pinaagi niining lokal nga produksyon sa RFID maapil na kini unya og hatag sa plaka sa mga sakyanan gikan mismo sa mga car dealers. “By the end of this year, ang four wheels nga mga sakyanan dili makagawas gikan sa ilang gipalitan nga car dealer nga walay RFID sticker ug plaka. End of the days nga tawgon ta og Republika na walang plaka,” matud pang Caindec. (Gikan sa The Freeman/IBM)