P100 milyon balor sa proyekto sa turismo sa Talisay

CEBU, Philippines — Gitagsa-tagsa sa pagbisita ni Talisay City Mayor Gerald Anthony “Samsam” Gullas Jr. ang mga senador aron personal nga magpatabang sa daku niyang plano sa siyudad.

Si Gullas una nang nipahibawo nga usa sa iyang programa ang pagbuhi pagbalik sa turismo sa siyudad diin magbutang siya og boardwalk, food court ug pagbuhat sa central plaza sa Barangay Poblacion nga maila nga world class tourist destination.

Matud ni Gullas nga gawas sa ilang kaugalingong pundo sa dakbayan, mangayo siya og ayuda gikan ni Kongresista Eduardo Gullas ug ni Gobernador Gwendolyn Garcia.

Mokabat sa P100 milyones ang balor sa proyekto nga iyang gitinguha.

Nalipay si Gullas sa pagsanong nilang Senador Cynthia Villar, Grace Poe, Ronald “Bato” dela Rosa, Bong Go, Sherwin Gatchalian, Miguel Zubiri, Nancy Binay, Imee Marcos, Sonny Angara, Pia Cayetano ug Francis Tolentino.

Makigtagbo sab ang mayor ni Tourism Secretary Bernadette Romulo-Puyat. (Gabriel C. Bonjoc/GMR)

Provincial, barangay roads duna nay standard

Nagtakda ang Kapitolyo og standard sa sukod sa mga provincial ug barangay roads.

Ang pagpaayo sa kadalan sa probinsiya maoy daku nga gigahinan sa supplemental budget nga gipasar sa Provincial Board nga moabot sa P800 milyones.

Matud ni Gobernador Gwendolyn Garcia nga unahon nila pagtrabaho ang “fair to poor state” nga dalan diin target sa probinsiya nga ma-cover ang 70 ngadto sa 80 porsyento sa kadalanan sa kalungsuran.

Kun kaniadto aspalto ang pagpaayo sa mga provincial ug barangay roads, karon sementado na.

“We are setting a standard to all provincial roads, 5 meters wide in areas nga dili kaayo heavy ang traffic and 8 inches thick katong medyo heavy pun-an na nato from 9 to 10 inches ang thickness,” matud ni Garcia.

“We are also setting a standard sa atong barangay road, 4 meters wide and 6 inches thick nga concreting ang pavement mismo,” dugang sa gobernador.

Matud ni Garcia nga ang mga lungsod ug barangay na maoy motrabaho sa clearing sa mga dalan kun adunay problema sa road right of way.

Dugang niya nga ang dili maapil sa supplemental budget karon, gahinan og pondo sa annual budget alang sa tuig 2020. (/GMR)(BANATNEWS)