CEBU, Philippines – Labing minus 200 ka awto ug motor nga ilegal nga nakaparada sa daplin sa kadalanan ang gi-clamp sa mga traffic enforcers sa Cebu City Transportation Office kagahapon.
Matud ni CCTO operations head Andres Bayarcal nga ang opisina nipahugot sa pagpatuman sa ordinansa sa siyudad batok sa mga ilegal nga parking sa kadalanan tungod kay makamugna kini og trapik.
Adunay mga awto nga gipanag-iya sa gobiyerno ang lakip sa na-clamp.
Si Mayor Edgardo Labella niingon nga iya kining kamanduan nga ipatuman ang balaud nga patas sa tanan.
“That was my instruction. We really have to clear our streets. We will just have to do it. Also, to clear our streets. No special treatment,” matud sa mayor.
Dili mokabat sa 50 ka kawani sa CCTO ug mga polis ang niapil sa operasyon sa lain-laing dapit sa siyudad sugod sa tungang gabii kagahapon.
Makakolekta ang kagamhanan sa siyudad og bayad nga P1,500 alang sa clamping ug towing fees sa matag usa sa ilegal nga pag-parking sa daplin sa karsada.
Gipasabot ni Bayarcal nga ang iyang opisina magpadayon sa pagpahigayon sa mga random nga operasyon labi na sa overnight parking.
Gikan sa Hulyo 1 hangtud Hulyo 31, ang CCTO nagpahigayon usab sa daghang operasyon igo sa 335 ka yunit nga clamping sa adlaw ug 80 sa overnight clamping.
Nag-isyu usab ang CCTO og mga citation ticket alang sa lainlaing kalapasan sa balaud sa trapiko sa 104 ka drayber sa traysikad, 195 ka drayber sa e-bike, 54 ka drayber sa traysikol, ug 249 ka drayber sa motorsiklo. (/GMR)(BANAT NEWS)