Sisterhood tinguha sa sugbo ug Davao
CEBU, Philippines – Nipadangat og letter of intent ang Probinsiya sa Sugbo ngadto sa Dakbayan sa Davao alang sa usa ka sisterhood agreement tali sa duha ka lokal nga kagamhanan.
Si Gobernador Gwendolyn Garcia maoy personal nga nitunol sa maong sulat ngadto kang Davao City Mayor Sara Duterte-Carpio nga maoy nagsilibng guest of honor sa pagbukas sa selebrasyon sa ika-450 nga kasumaran sa lalawigan kagahapon sa Capitol Social Hall.
Sa maong letter of intent gisaysay nga ang Probinsiya sa Sugbo ug Dakbayan sa Davao parehong adunay “colorful” nga kasaysayan ug gikonsiderar nga modelo pag-abot sa local development ug parehong nakadawat og nagkadaiyang pasidungog pag-abot sa maayo nga practices sa pang-gobiyerno nga nakapalambo sa socio-economic condition sa mga tawo niini.
“Despite differences in population and land area, both local government units can learn a great deal from each other by sharing strategies, experiences and policies in areas of urban planning development, socio-cultural programs, education health, disaster and risk management, community organization, tourism and local governance,” pagbasa sa maong letter of intent.
Atol sa iyang mensahe kagahapon, si Garcia nagkanayon nga sa iyang paglingkod balik pagka-gobernador sa Lalawigan sa Sugbo, iyang tinguha nga mabalik ang Sugbo sa pagka-numero uno.
Si Duterte-Carpio sa iyang bahin nagkayon nga mohatag sila og positibo nga tubag sa letter of intent sa Kapitolyo ilabi na nga nagtuo siya nga daku ang matabang sa maong sisterhood agreement sa ilang dakbayan pinaagi sa makuha o makopya nga mga best practices sa Davao gikan sa Probinsiya sa Sugbo.
“Never pa mi nag-number one nga city ang Davao, amo na tan-awaon. Medyo dehado ang location but libre man ang mangarap basin pa diya maabot ang panahon…ma number one among city,” matud ni Carpio. (/GMR)(BANAT NEWS)
- Latest
