Labella natinguha rugby ma-regulate

CEBU, Philippines — Gihagit ni Cebu City Mayor Edgardo Labella ang konseho sa siyudad sa pagpasar og ordinansa sa pag-regulate sa pagpamaligya og rugby.

Gibutyag ni Labella nga mas pabor siya nga ordinansa gyud ang buhaton sa maisogon nga konsehal nga mohimo niini ug dili lang kutob sa usa ka executive order.

Gihangop ni Labella nga adunay mga nadakpan nga nagpayuhot og rugby sa mga menor de edad nga nasikop sa kapolisan.

Sumala pa sa mayor nga magsilbi kining leksyon sa mga tigbaligya og rugby sa mga bata ang mga nadakpan tungod kay nahatagan na og sulbad ang dugay na kaayong problema diin dili mahimong dakpon ang mga menor de edad apan kadto gyud ang supplier.

Awhag ni Labella sa kapolisan nga ipadayon sa pagsikop ang mga nalambigit sa pagpayuhot niini tungod kay nakahatag kini og dakung problema sa utok sa kabataan nga nigamit niini.

Sa laing bahin, usa ka subject sa search warrant ang nakasibat dihang nakamatikod sa presensya sa kapolisan atol sa operasyon sa A. Lopez, Labangon, Dakbayan sa Sugbo niadtong Domingo.

Giila ang suspek nga si Joel Cagado, high-value target, hingkod, molupyo sa maong lugar.

Apan nasakmit ang 26 ka pakete sa gituohang shabu nga nagkantidad og P163,000.

Samtang sa Barangay Carreta nasikop si Rolando Adlawan kinsa nasakmitan og usa ka .22 kalibre nga revolver nga dunay sulod tulo ka bala ug walo ka pakete sa shabu balor og P40,800. - Jenny Luz R. Tejas (BANAT NEWS)