CEBU, Philippines — Karaang building nga kaniadto buhatan sa Social Security System dinhi sa Sugbo diha sa eskina sa Gorordo Avenue ug dalan Escario naguba human nga may bahin niini ang nahugno tungod sa pagkubkob sa kilid niini alang sa tukoron nga silingang building kagahapon.
Si Mayor Edgardo Labella sa Dakbayan sa Sugbo moluwat og cease and desist order batok sa kontraktor sa Vista Residence tungod sa pagkapahak sa usa ka bahin sa Juanita Building nga kanhi gigamit sa SSS isip ilang buhatan dinhi sa Sugbo.
Si Labella mimando kagahapon sa Office of the Building Officials nga moduso sa iyang buhatan ug incident report, assessment lakip ang rekomendasyon sa maong panghitabo. Wala hinuoy natalang naangol o nakalas sa hitabo.
Tungod sa nahitabo, gimando niyang ipahunong ang excavation operation sa lugar samtang gipaabot pa ang resulta sa inspeksyon sa lugar ug sa nahugno nga building apil na ang mga kasikbit nga mga edipisyo.
Ang siyudad gusto karon mokuha og consultant nga usa ka structural engineer kay wala ang siyudad niini. Mao kini ang eksperto sa kalig-on sa mga buildings ilabi na kun may mga katalagman aron pagsusi kun mahimo pa kining gamiton o dili.
Matud ni Labella, 26 ka andanang condominium ang tukoron sa maong gikubkob nga dapit ug lain sab nga 18 ka andanang condominium ang tukoron dili layo sa maong lugar.
Busa buot sa mayor nga ipasusi og maayo ang komposisyon sa yuta sa dapit kun luwas ba kining tukoran og mga tag-as nga mga edipisyo.
Ang OIC-Building Official Chief Florante Catalan nitug-an adunay excavation, building permit nga aprubado apan diha nagkaproblema sa implementasyon sa soil protection.
Dugang pa ni Catalan, ang nagdumala sa Juanita Building aduna nay communication sa Vista Residences nga nagpahibalo nga dunay pagpangliki sa ilang building.
Ang Corrtech Inc. nga sub-contractor sa IPM nga maoy general contractor sa maong proyekto nihimo og inspection sa site. Ug giingong duna silay report nga gihuptan niini, diin base sa taho dakong volume sa tubig ang niagas atol sa drilling.
Giawhag ang tagdumala sa Juanita Building nga mo hire og structural engineer aron masuta kung luwas pa ba ang ilang building. Pagkakaron, di una pasudlan og tawo ang maong edipisyo.
Giklaro ni Catalan, dili ang kakaraan sa building maoy hinungdan sa pagkahugno kundili ang excavation operation. Matud niya duna silay nakitang lapso sa hitabo maong nipagawas sila og Building Suspension Order ug pasumiteron sila og incident report ug sa paghimo sa mga angayan buhaton. (BANAT NEWS)