CEBU, Philippines — Hingpit na nga mobiya sa Sugbo si Auxiliary Bishop Dennis Villarojo diin siya maoy gitudlo isip ikalima nga obispo sa Diocese of Malolos.
Usa ka farewell party nga gitawag og “panugon” ang gipahigayon sa Archdiocese of Cebu sa nilabay nga gabii diha sa Cebu International Eucharistic Congress nga gitambongan usab ni Archbishop Jose Palma, Archbishop John Du sa Diocese of Palo, mga kaparian, higala, pamilya ug mga nakauban niini sa nilabay nga IEC 2016 ug uban pa.
Unang agenda nga buhaton ni Villarojo sa Diocese of Malolos mao nga mamati ug makig-ila-ila siya sa iyang mga ginsakopan.
Niadtong Mayo 14, si Villarojo gipili ni Pope Francis nga maoy ikalima nga Obispo sa Diocese of Malolos siya maoy nihulip kang Bishop Jose Oliveros nga namatay niadtong Mayo 11 sa nilabay nga tuig.
Sa wala pa hingpit nga nibiya si Villarojo usa ka dakong painting ang gipahalipay kaniya sa mga Sugbuanon nga gideboho sa batid nga Sugbuanon nga pintor nga si Florentino “Jun” Impas.
Sa hulagway sa painting anaa ang panagway ni Villarojo nga naglingkod sul-ob sa iyang sapot isip obispo ug adunay bintana nga makita ang Minore Basilica sa Our Lady of Immaculate Conception nga mao ang Cathedral nga iyang pagasilbihan.
Sa maong simbahan usab ipahigayon ang installation ni Villarojo isip obispo karong umaabot Agusto 21, 2019.
Si Palma nagkanayon nga bukas gihapon dinhi sa Sugbo si Villarojo tungod kay pabilin kining gihigugma sa katawhan ug mao usab kini ang iyang pinuy-anan bisan og maadto na kini sa lain nga lugar. (/BDB)(BANATNEWS)